Mihal Gjergji: E pashë një nënë

Mihal Gjergji

E PASHË NJË NËNË

U pamë në sy dhe befas ndala

M’u bë se ishte nëna ime

Te buzë e çarë këputej fjala

Te fjala ndjeva ngashërime

I mora duart t’ia lexoja

Me gjuhë misteresh, si një libër

Mermer i ballit mbushur shkronja

Herë si Kuran e herë si Bibël!

E pashë një labe hijerëndë

Nuk di nga ç’tempull kishte zbritur

Vajtim i saj më bëhej këngë

Dhe kënga djepet kishte ngritur!

Tiranë, Mars 2023