Blerim Latifi: Kontradikta që nxit trazirat në botën islame

Prof. Blerim Latifi:

Gjithë vikendin e kam kaluar duke parë lajme e duke lexuar tekste mbi luftën që ka nisur midis SHBA-së dhe Iranit. Duke lexuar mbi kastën që drejton aktualisht Iranin, më doli para syve një profil paradoksal i një pjesëtari të saj: Ali Larijani, këshilltar i lartë i ajatollahut tashmë të vdekur dhe shef i sigurisë kombëtare të Iranit.

Fillimisht student i matematikës dhe inxhinierisë kompjuterike, Larijani më pas i hyn studimit të filozofisë, duke u bërë profesor i saj dhe një nga ekspertët më të mirë në Iran për filozofinë perëndimore. Doktoratura e tij paraqet një studim të thelluar mbi filozofinë racionaliste të Immanuel Kantit.

Dhe paradoksi: si mundet një studiues i Kantit, i cili këmbëngul në idenë e lirisë së individit dhe në ligjin moral që buron nga arsyeja njerëzore, të jetë në krye të një regjimi totalitar që bazohet në idenë se ligji moral vjen nga autoriteti hyjnor?

Si mundet të rrinë bashkë filozofia e Kantit, e cila del dhe e shpie përpara programin emancipues të Iluminizmit, dhe një regjim teokratik i cili është ngritur mbi përmbysjen e këtij programi dhe prej 47 vitesh e lufton atë sistematikisht?

Jam i prirur me mendu se këtu nuk kemi të bëjmë thjesht me një intelektual oportunist, por me shfaqjen e dilemës më të madhe historike të botës islamike moderne: të pranohet apo të refuzohet moderniteti perëndimor?

Larijani shpreh atë rrymë në botën islamike që mendon se moderniteti perendimor duhet përdorur teknikisht, por duhet refuzuar në aspektin intelektual dhe etiko-juridik. Por kjo ide përmban një kontradiktë fundamentale që nuk përballohet dot as logjikisht as moralisht. Dhe pikërisht nga kjo kontradiktë buron gjithë trazira e sotme e botës islame.

_________

Ka edhe shumë shqipfolës që e dëshirojnë një gjë të tillë. Dhe ju e dini shumë mirë cilët janë dhe si duken. Arsyeja është e qartë: të dyja palët janë nën komandën e Beogradit; ndryshon vetëm metodologjia e veprimit të tyre.