Asllan Dibrani – Luani: Kosova në udhëkryqe për president: Koha për një emër që bashkon kombin dhe tejkalon partitë

Kosova në udhëkryqe për president: Koha për një emër që bashkon kombin dhe tejkalon partitë

Shkruan Asllan Dibrani – Luani

Ngërçi institucional nuk zgjidhet me emra partiakë, por me figura unifikuese që tejkalojnë ndarjet politike dhe rikthejnë besimin qytetar e ndërkombëtar.

Kosova në një ngërç politik të thellë

Kosova po përballet me një situatë politike të ndërlikuar, ku mungesa e konsensusit mes partive po e thellon krizën institucionale.

Emra të përmendur deri më tani për pozita të larta shtetërore, si Ramush Haradinaj, Kolë Berisha apo figura të tjera të ngjashme, mbeten më shumë në nivel supozimesh sesa alternativa reale për zgjidhje.

Realiteti politik tregon se asnjë nga këta emra nuk gëzon mbështetje të plotë as brenda partive të tyre, e lëre më të sigurojnë 80 vota në Kuvend. Edhe pse Vetëvendosje ka dalë fituese në zgjedhje, matematikat politike tregojnë se ky ngërç nuk mund të zgjidhet pa një konsensus të gjerë ndërpartiak.

Në këtë situatë, vendi ka nevojë për një zgjidhje që tejkalon interesat e ngushta politike.

Nevoja për figura unifikuese

Kosova sot nuk ka nevojë për një president apo lider që përfaqëson vetëm një parti. Ajo ka nevojë për një figurë që përfaqëson sakrificën, unitetin dhe historinë e përbashkët të shtetit.

Familja Jashari përfaqëson një simbol unik në historinë e Kosovës. Sakrifica e 53 anëtarëve të kësaj familjeje për lirinë e vendit është një ndër aktet më të mëdha të flijimit në historinë moderne të Evropës. Përfaqësimi i Kosovës nga një figurë e kësaj familjeje do të kishte një peshë të jashtëzakonshme morale dhe ndërkombëtare, pavarësisht nivelit formal arsimor apo përkatësisë politike.

Megjithatë, nëse një rol i tillë merret nga një përfaqësues i kësaj familjeje, është e domosdoshme një distancim i qartë nga çdo ndikim i grupeve të islamizmit politik, të cilat përpiqen ta paraqesin luftën e tyre si një kauzë fetare. Rezistenca e familjes Jashari ishte dhe mbetet një luftë për liri kombëtare dhe shtetësi, jo për ideologji fetare.

Roli i Vjosa Osmanit dhe nevoja për një fazë të re

Presidentja aktuale, Vjosa Osmani, ka qenë një figurë e denjë dhe përfaqësuese e shtetit të Kosovës në momente të rëndësishme. Kontributi i saj në ruajtjen e stabilitetit institucional dhe në përfaqësimin ndërkombëtar është i pamohueshëm. Ajo ka treguar integritet dhe vizion pro-perëndimor, duke u shndërruar në një figurë simbolike për Kosovën moderne.

Megjithatë, rrethanat aktuale politike kërkojnë një qasje të re dhe një emër që mund të shërbejë si pikë bashkimi përtej ndarjeve ekzistuese. Në këtë moment, më shumë se vazhdimësi individuale, vendi ka nevojë për një simbol të ri uniteti kombëtar.

Nëse presidentja aktuale nuk arrin të sigurojë rizgjedhjen sipas rregullave të Kushtetutës dhe të marrë mbështetjen e duhur për të garantuar kuorumin e votave, rradhën për presidencë e ka familja Jashari – një simbol unifikuese që bashkon kombin mbi interesat partiake.

Çfarë kërkon situata aktuale?

Për të dalë nga kriza politike, zgjidhja duhet të bazohet në disa parime thelbësore:

• Kandidat mbi partitë dhe interesat e ngushta politike
• Figurë me integritet moral dhe besueshmëri publike
• Mbështetje të gjerë ndërpartiake
• Përfaqësim dinjitoz në arenën ndërkombëtare
• Distancim nga çdo ekstremizëm ideologjik apo fetar
• Mesazh bashkimi për shoqërinë dhe institucionet

Momenti për përgjegjësi historike

Kosova nuk mund të përballojë një krizë të zgjatur institucionale. Në një kohë sfidash të mëdha politike, ekonomike dhe gjeopolitike, vendi ka nevojë për stabilitet, unitet dhe vizion të përbashkët.

Ky është momenti kur liderët politikë duhet të tejkalojnë interesat partiake dhe të tregojnë përgjegjësi historike. Zgjedhja e një figure unifikuese nuk është kompromis politik — është domosdoshmëri shtetërore.

Kosova është ndërtuar mbi sakrificë dhe unitet. Vetëm duke iu rikthyer këtyre vlerave mund të kapërcejë krizën dhe të ecë përpara si një shtet i fortë dhe i respektuar. Në këtë kontekst, familja Jashari përfaqëson rrugën më të besueshme për një president që bashkon kombin dhe tejkalon ndarjet politike, nëse alternativat aktuale nuk mund të sigurojnë unitet dhe kuorum.