Rejhane Rexhepi: Bashkësia Shqiptare në Bosnje dhe Hercegovinë – Ura e kujtesës, kulturës dhe identitetit kombëtar në Sarajevë

Bashkësia Shqiptare në Bosnje dhe Hercegovinë – Ura e kujtesës, kulturës dhe identitetit kombëtar në Sarajevë

Nga Rejhane Rexhepi

Bashkësia Shqiptare në Bosnje dhe Hercegovinë, nën udhëheqjen e kryetares së saj, znj. Elvira Dushi, po vazhdon me përkushtim, vizion dhe përgjegjësi institucionale misionin e nisur ndër vite nga ambasadori i palodhur i çështjes shqiptare, Muharrem Zejnullahu. Përmes një sërë aktivitetesh kulturore, përkujtimore dhe kombëtare, kjo Bashkësi ka arritur të ruajë gjallë identitetin shqiptar në Sarajevë, duke ndërtuar ura miqësie dhe bashkëpunimi me institucionet dhe shoqërinë e Bosnje dhe Hercegovinës.

Në këtë frymë, Bashkësia Shqiptare në BeH ka njoftuar se më 15 shkurt, në Sarajevë, do të organizohet shënimi solemn i përvjetorit të shpalljes së Pavarësisë së Republikës së Kosovës, një ngjarje me rëndësi të veçantë jo vetëm për komunitetin shqiptar në Bosnje dhe Hercegovinë, por edhe për miqtë e Kosovës dhe vlerave të saj shtetërore.

Manifestimi do të hapet me inaugurimin solemn të ekspozitës fotografike të anëtarit të ri të Bashkësisë Shqiptare, Din Hreliqi, e cila pritet të sjellë një dimension artistik, reflektues dhe identitar mbi kujtesën kolektive, përkatësinë kulturore dhe lidhjen shpirtërore me atdheun. Ekspozita synon të komunikojë përmes artit vizual histori, emocione dhe simbole që bashkojnë shqiptarët përtej kufijve shtetërorë.

Programi do të vazhdojë me një koncert të veçantë të një kvarteti me violina, i cili do të interpretojë vepra të zgjedhura të kompozitorëve shqiptarë. Ky segment artistik, me një kohëzgjatje prej rreth 35 minutash, do t’i japë mbrëmjes një frymë të lartë estetike dhe emocionale, duke e shndërruar manifestimin në një përjetim kulturor dinjitoz dhe të paharrueshëm.

Gjatë kësaj ngjarjeje do të realizohet edhe ndarja e mirënjohjeve për individë që kanë dhënë kontribut të veçantë në veprimtarinë, konsolidimin dhe zhvillimin e Bashkësisë Shqiptare në Bosnje dhe Hercegovinë, si shenjë respekti institucional dhe falënderimi publik për angazhimin e tyre të vazhdueshëm.

Në manifestim janë të ftuar përfaqësues të qeverisë lokale, ambasadorë, profesorë universitarë, intelektualë, personalitete të jetës publike, anëtarë të Bashkësisë Shqiptare, si dhe miq e dashamirë të komunitetit shqiptar në Bosnje dhe Hercegovinë. Prezencën e tij e ka konfirmuar Ambasadori i Republikës së Kosovës në Zagreb, ndërkohë që po shqyrtohet edhe mundësia që ngjarjes t’i drejtohet me një mesazh përshëndetës Kryeministri i Republikës së Kosovës, në dy gjuhë, ashtu siç ka ndodhur edhe në shënimin e 15-vjetorit të Pavarësisë.

Bashkësia Shqiptare në Bosnje dhe Hercegovinë ka bërë të ditur se për këtë aktivitet do të njoftohen mediat lokale dhe rajonale, me qëllim që mesazhi i unitetit, kulturës, kujtesës historike dhe bashkëjetesës të përcillet tek një audiencë sa më e gjerë.

Ndërkohë, një tjetër aktivitet me peshë të madhe historike dhe emocionale është planifikuar të mbahet më 16 prill, kur pritet organizimi i një tubimi të madh me shqiptarët që morën pjesë në Luftën e Bosnjës. Ky tubim synon jo vetëm nderimin e të rënëve, por edhe bashkimin e dëshmitarëve të gjallë të asaj periudhe, duke krijuar hapësirë për rrëfim, reflektim dhe dokumentim historik, në mënyrë që sakrifica e shqiptarëve në Bosnje të mos mbetet në heshtje apo të mbulohet nga harresa.

Kjo nismë përfaqëson një hap të rëndësishëm drejt drejtësisë morale, kujtesës kolektive dhe respektit për jetët e humbura, duke dëshmuar se ruajtja e historisë nuk është vetëm një e drejtë, por një detyrim njerëzor, moral dhe kombëtar.