Ndue Ukaj: Kujtoj Ismail Kadarenë, njeriun që i ka dhënë nder e dinjitet të përbotshëm artit

Ndue Ukaj:

Sot, në 90 - vjetorin e lindjes, e kujtoj Ismail Kadarenë, njeriun që i ka dhënë nder e dinjitet të përbotshëm artit, gjuhës dhe kulturës shqiptare.

E kujtoj veprën e tij të madhe letrare, e cila, që në rini, më ka mrekulluar, duke u bërë bashkudhëtare në jetën time. Më ka magjepsë e më ka mësuar si ta  kuptosh se nuk mund ta kuptosh ç’do të thotë vend i lirë, kur rritesh në robëri. Dhe teksa e kujtoj sot përmasën e saj, e ndiej gëzimin që më ka dhënë ndër vite. Pastaj, i kujtoj me gëzim ato takime e momente fantastike, me të, në Prishtinë dhe Tiranë.

E kam thënë shpesh se në ato rrathët e ferrit, nëpër të cilët kam kaluar unë dhe brezi im, përgjatë viteve të rënda të 90-tave, Ismail Kadare ishte si prijësi në “Ferrin” e Dantes, kurse vepra e tij, një dritë në atë terr të madh.

Mbasi e fituam lirinë fizike, për çka Kadareja është shumë meritor, kam pasë rastin të bëja edhe disa hapa me të, dhe ata hapa, kanë vulosë diçka të pashlyeshme në zemrën time, për çka e kujtoj me shumë dashuri.

Po, i frymëzuar prej veprës së tij, kam bërë hapa që më kanë shpie në botën magjepse të artit, duke fituar që herët, një atdhe paralel e një mrekulli që të jep letërsia. Një atdhe që me kënaq përditë, më jep gëzim, forcë e lumturi, lumturinë e leximi e të krijimit, për çka i jam mirënjohës Ismail Kadaresë dhe veprës së tij madhështore.

Dhe sot, përditë e më shumë e shoh se vepra e tij, ka forcë që ta shpie lexuesin matanë territ, matanë ligështisë morale dhe mund të shërbej si ilaç për shëndetin tonë kombëtar, prandaj, me shumë të drejtë Át Zef Pllumi pohonte, se “historia jonë është një histori llogoret e sot me i madhi luftëtar në mbrojtje të kulturës, identitetit dhe integrimit evropian të shqiptarëve, është Ismail Kadareja e unë gjendem krah për krah tij në ato llogore.”

Gëzuar, mjeshtër, atje lart, në ato lartësi qiellore të artit, ku jetove përherë.