Kastriot Dervishi: Biblioteka Kombëtare

Në numrin 56 të datës 10.12.1922, "Fletorja zyrtare" njoftonte se ishte përuruar në Tiranë, brenda Ministrisë së Arsimit, Biblioteka Kombëtare. Profesor Karl Gurakuqi ishte emëruar më 9.6.1922 drejtor i Bibliotekës së Shtetit. Kjo bibliotekë ishte formuar fillimisht në Shkodër më 16.4.1917 me urdhër të drejtorit të përgjithshëm të Arsimit në Shkodër, Luigj Gurakuqi, kur u krijua bërthama e parë e bibliotekës e quajtur e komisisë letrare, e cila njohu si mbikëqyrës Hilë Mosin e më pas Luigj Naraçin. Më 10.7.1920, ministri i Arsimit, Sotir Peci, urdhëroi që biblioteka të shpërngulej në Tiranë pranë Ministrisë së Arsimit. Njoftimi bënte të ditur se biblioteka kishte 6 mijë vëllime. Njoftohej se kontribute kishin dhënë për pasurimin e bibliotekës, qeveria franceze, kolonitë shqiptare në Rumani dhe Mit'hat Frashëri.