Hysen Ibrahimi: Kontributi i Gani Azemit në promovimin e lirisë dhe pavarësisë së Kosovës

IBRAHIM RUGOVA NË VLERËSIMET E TIJ POLITIKE, E KONSIDERONTE GANI AZEMIN SI NJË NGA ZËRAT MË TË FUQISHËM NË PËRFAQËSIMIN DHE MBRIJTJEN E PAVARËSISË SË REPUBLIKËS SË KOSOVËS NË BRUKSEL.

Kontributi i Gani Azemit në promovimin e lirisë dhe pavarësisë së Kosovës

Nga Hysen Ibrahimi

Procesi i lirisë dhe i pavarësisë së Kosovës është rezultat i një veprimtarie të gjatë politike, diplomatike dhe intelektuale, në të cilën figura të shumta kanë dhënë kontributin e tyre të çmuar. Një ndër personalitetet që ka luajtur një rol të rëndësishëm në këtë proces është Gani Azemi. I formuar në mjedisin akademik të Profesorëve Prof. Dr. Fehmi Agani dhe Prof. Ukshin Hoti, si dhe i frymëzuar nga filozofia politike e Presidentit historik Dr. Ibrahim Rugova, Azemi arriti të ndërthurë veprimtarinë intelektuale dhe diplomatike me angazhimin atdhetar. Qëllimi i këtij punimi është të analizojë kontributin e tij në promovimin e çështjes së Kosovës në arenën ndërkombëtare.

Studimet dhe ndikimi i mendimit të Prof. Dr. Fehmi Aganit dhe Prof. Ukshin Hotit i dhanë Gani Azemit një bazë të fuqishme intelektuale. Në anën tjetër, filozofia e rezistencës paqësore e promovuar nga Presidenti Rugova ndikoi thellësisht në qasjen e tij politike. Rugova, në disa raste, e ka cilësuar Azemin si “zërin e pavarësisë së Kosovës në Bruksel”, duke e vlerësuar për përkushtimin dhe besueshmërinë e tij.

Me vendosjen në Bruksel, kryeqytetin e Belgjikës dhe qendrën politike të Bashkimit Evropian, Azemi i dha një dimension të ri lobimit për Kosovën. Përmes kontakteve me personalitete të rëndësishme evropiane, ai arriti të krijojë një rrjet ndikues dhe të paraqesë gjendjen e rëndë të Kosovës. Kjo veprimtari u bë veçanërisht e rëndësishme në periudhën e fundit të viteve ’90, kur çështja e Kosovës ishte në agjendën ndërkombëtare.

Roli gjatë luftës së Kosovës gjatë bombardimeve të NATO-s (1999), Azemi qëndroi pranë zëdhënësit të Aleancës, James Shea, duke qenë pjesë e komunikimit publik ndërkombëtar për zhvillimet në Kosovë. Njëkohësisht, në Konferencën e Rambujesë, ai veproi si zëdhënës i Presidentit Rugova, duke përfaqësuar zërin e institucioneve legjitime të Kosovës në arenën diplomatike. Ky rol dëshmon për besimin që lidershipi politik i Kosovës kishte tek ai dhe për peshën e kontributit të tij.

Dimensioni personal dhe vlerësimi i Presidentit Rugova shpesh e përmendte edhe faktin se Azemi kishte qenë binjak, por kishte humbur vëllain pas lindjes. Në mënyrë simbolike, Rugova theksonte se “zëri binjak” do ta kishte fuqizuar edhe më tej misionin e tij për pavarësinë e Kosovës. Ky detaj jo vetëm që ilustron marrëdhënien e afërt mes tyre, por edhe theksimin e rolit unik që Rugova i atribuon Azemit.

Kontributi i përpjekjeve konkrete diplomatike, Azemi i kushtoi jetën kauzës së pavarësisë dhe integrimit euroatlantik të Kosovës. Ai shprehej se “Dardania jonë e ka vendin në mesin e kombeve të lira evropiane”, duke e konsideruar pavarësinë si një arritje historike dhe të patjetërsueshme. Megjithatë, kontributi i tij madhor ende nuk është vlerësuar në mënyrë të plotë nga institucionet e Republikës së Kosovës, gjë që nënkupton nevojën për një studim të mëtejshëm dhe përkujtim të strukturuar të veprës së tij.

Kontributi i Gani Azemit në procesin e pavarësimit të Kosovës dëshmon ndërthurjen e mendimit intelektual me veprimtarinë diplomatike dhe angazhimin atdhetar. Roli i tij në Bruksel, në Rambuje dhe në komunikimin ndërkombëtar të Kosovës e pozicionon atë si një ndër figurat e rëndësishme të diplomacisë shqiptare të fund shekullit XX. Vepra e tij mbetet një trashëgimi që duhet studiuar më tej dhe një model frymëzues për gjeneratat e ardhshme që synojnë të forcojnë pozitën ndërkombëtare të Republikës së Kosovës.