Entela Binjaku: Mbahet në Llapushnik të Kosovës veprimtaria letraro-kulturore: "Qershori i Lirisë- takimet "Jeronim De Rada", edicioni VIII

Mbahet në Llapushnik të Kosovës veprimtaria letraro-kulturore: "Qershori i Lirisë- takimet "Jeronim De Rada", edicioni VIII

Nga Entela Binjaku

Ditën e shtunë më 7 qershor 2025 në  Kishën Katolike Shqiptare të “Shën Abrahamit” në Llapushnik të Drenasit, letrarë, dashamirës së kulturës kombëtare, miq e të njohur, u mblodhën në veprimtarinë me titull: "Qershori i Lirisë -Takimet "Jeronim De Rada". Kisha e "Shën Abrahamit" gëzon një pamje madhështore dhe ndodhet e vendosur në një zonë simbol të historisë siç është Llapushniku nga ku vështrimi përqafon Drenasin dhe zonën përreth. "Gryka e  Llapushnikut" është e njohur për qëndresën e Ushtrisë Çlirimtare të Kosovës, për heronjtë dhe dëshmorët e rënë në betejën me regjimin ushtarak-e policor serb. Veprimtaria kulturore e sivjetme ishte e teta e organizuar nga  Shoqata për art dhe kulturë – "Jeronim De Rada" që ka zgjedhur për organizim qershorin, muajin e Lirisë për Kosovën. Për organizimin me përpikëri të këtij takimi u kujdes Këshilli Organizativ i përbërë nga: famullitari i Kishës Don Pal Tunaj, znj. Rina Sopi, studente e Gjuhës shqipe, gazetari, ish luftëtari i UÇK-së, z. Ismet-Marin Sopi dhe znj. Drita Kosumi Syla. Nën moderimin e zonjës Kosumi Syla, në një mjedis të ngrohtë e shpirtëror, takimi i këtij qershori u çel nga fjalët e Don Pal Tunaj, Famullitarit të Kishës i cili në cilësinë e nikoqirit uroi mirëseardhjen të pranishmëve, ardhur nga brenda dhe jashtë Kosovës. Çdo vit takimi ka një Sesion Shkencor ku mbahen kumtesat që edhe hapin takimet. Këtë vit ishin vlerësuar të mbaheshin dy kumtesa për të shënuar përvjetorin e Naum Veqilharxhit, njërit ndër themeluesit e Rilindjes Kombëtare Shqiptare. "Veprimtaria patriotike e Naum Veqilharxhit në Br?ila të Rumanisë” ishte titulli i kumtesës së znj. Entela Binjaku, sociologe dhe pedagoge. Shkrimtari dhe përkthyesi në disa gjuhë të botës z. Elvi Sidheri mbajti kumtesën me titull: “Naum Veqilharxhi, disa fakte të panjohura për familjen dhe jetën e tij” duke trajtuar zbulimin dhe trajtimin e një pjese të historisë së Veqilharxhit. Në fjalët e mbajtura prej tyre u sollën për te pranishmit përzgjedhje të hulumtimeve mbi këtë figurë të rëndësishme duke u ndalur në kontributin e shquar të patriotit të shquar në drejtim të gjuhës shqipe dhe të kulturës sonë kombëtare. Takimi më pas vijoi me "Orën poetike" ku protagonistë ishin autorë ardhur nga të gjitha viset shqiptare si dhe nga jashtë Kosove. Krijimtaria e paraqitur në këtë sesion të vitit 2025 u vlerësua nga një Juri Profesionale dhe Komision  i kryesuar nga Prof. Drita Isufaj nga Durrësi dhe nga dy anëtarët znj. Bruna Gjoni Përvathi nga Lezha dhe poeti pejan zn. Agim Desku. Në garën për cmime morën pjesë 70 krijime poetike. Kryetarja e Jurisë, profesoresha Drita Isufaj dhe anëtarja e Këshillit Organizativ, studentja e gjuhës dhe letërsisë shqipe, Erina Sopi i dorëzuan poetit llapjan, Ramë Oraca çmimin e parë. Poetja Hava Shabanaj u nderua me çmimin “Hieronymus”, i ndarë nga Zyra për Përkthime “Hieronymus” dhe Shtëpia botuese me të njëjtin emër, në pronësit të prof. Dodë Ndrecaj nga Klina, njehërazi mbështetës i përvitshëm i Takimeve të Qershorit të Lirisë që nga fillimi i tyre. Autorja e njohur tropojane, znj. Zyra Ahmetaj, mbledhëse dhe kultivuese e folklorit dhe trashëgimisë sonë kulturore u nderua me çmimin “Halil Bogaj”. Juria e ngritur për vlerësimin e poezive vlerësoi me: çmimin e dytë z. Bekim Kelmendi dhe  çmimin e tretë – znj. Adelina Çarkaj nga Mitrovica. Me Çmimin "Halil Bogaj", u nderuan edhe znj. Fjolla Agusholli nga Gjakova. Ndërkaq me "Çmimin motivues" u nderua znj. Hava Shabani. Në takim kishte udhëtuar nga Austria për të qenë e pranishme poetja e njohur zonja Angjelinë Marku, shkrimtari dhe prozatori i mirënjohur z. Mentor Thaçi, i cili i dhuroi për Bibliotekën e Kishës disa libra të shkruar për arbëreshët e Italisë, si dhe një Gur me vlerë nga Arbëreshët. Pas ndarjes së çmimeve, takimi u përmbyll me dhurimin e  Librit të botuar me punimet e një viti më parë si dhe me një sofër të begatë ku organizatorët treguan edhe njëherë mikëpritjen bujare, karakteristikë e çmuar e kombit shqiptar.