Albert Habazaj: Lavdi Dëshmorëve! Mallkuar Hipokritët!

E SHKRUAR MË 5 MAJ

Lavdi Dëshmorëve! Mallkuar Hipokritët!

Albert HABAZAJ

Më falni, o të ndritshmit dëshmorë

Që sot në Datën tuaj të shenjtë

Tek më dhembin vargjet, me zemër në dorë

U përulem juve, por do t'i shaj qentë.

Jo qentë e stanit, as qentë e shtëpisë,

Por ata zagarët, langaraqët

Ata që llagëmin e hipokrizisë

Na e shesin si punë të fisme, të paqtë...

Nga varaka e fasadës lumturore

Të verbuar, të vyshkur, të vrazhdë, 

Maskat e fëlliqura marrin për dore

Harrojnë që ne shohim tej fasadës.

Vërshojnë vandakët me premtime legjendare

Sa që vetë premtimeve u bie të fikët,

Maskat e virtytit na u bënë si varre

Lavdi Dëshmorëve, mallkuar hipokritët!

Vlorë; e hënë, 5 Maj 2025