Asllan-Luan Dibrani: Z. Albin Kurti, Mos e përdhosni frymën e shtetformimit tonë!

Asllan-Luan Dibrani:

Z. Albin Kurti, po ju shkruaj si qytetar që deri dje kam qenë me ju. Por sot, më duhet ta them me zë të lartë: po më vendosni në provë.

Dje, më 9 prill 2025, e pamë publikisht praninë tuaj, krah për krah me Kryemyftiun e Bashkësisë Islame të Kosovës, Naim Tërnava, dhe me kreun e Bashkësisë Islame të Bosnje-Hercegovinës, Husein Kavazoviq. Në letër – mund të tingëllojë si takim formal institucional. Por në praktikë, për ne si komb, ky është një sinjal i rëndësishëm, dhe për fat të keq – shqetësues.

Shqiptarët nuk janë identitet fetar. Shqiptarët janë komb i përbashkët që i ka mbijetuar pushtimeve, ndarjeve, përçarjeve, falë vlerave tona laike, përfshirëse dhe kombëtare. Dhe ju e dini mirë këtë, sepse në të kaluarën keni qenë zëri i ashpër i kësaj fryme.

Por sot? Sot po shfaqeni krah figurave të diskutuara të islamit politik në rajon. Po shndërroni skenën publike të një qeverie demokratike dhe laike në një arenë simbolike që e shtyn Kosovën drejt një imazhi të rrezikshëm për të ardhmen e saj në Europë. Dhe ky nuk është vetëm perceptim – është pasojë.

Kjo thënie nuk është thjesht hiperbolë. Është alarm. Sepse ndërkohë që minoritetet fetare e etnike në Kosovë po përdorin hapësirën institucionale për të përhapur agjendat e tyre, ju – z. Kryeministër – po heshtni, ose edhe më keq, po bëheni pjesë e këtij normalizimi.

Kjo nuk është vetëm çështje imazhi. Është çështje e drejtimit të shtetit. Dhe kjo vlen për të gjithë shqiptarët – jo vetëm në Kosovë.

Prandaj, me keqardhje por edhe me vendosmëri, ju them:

Mos e përdhosni frymën e shtetformimit tonë. Mos e humbni besimin e atyre që besuan tek ju si lider i së majtës moderne dhe kombëtare. Largohuni nga instrumentalizimi fetar. Sepse po vazhduat kështu, nuk do t’ju rrëzojë opozita, por do t’ju rrëzojë populli që nuk pranon të kthehet mbrapa në histori.