Florim Zeqa: Turr e vrap drejt grazhdit politik!

Turr e vrap drejt grazhdit politik!

Tani kur janë duke u numëruar 'kokrrat' e fundit të bereqetit elektoral, politikanët e zgjedhur janë duke e pritur me padurim që t'i afrohen grazhdit politik! Ende pa hyrë në 'S(ht)allen e madhe' të kuvendit të quajtur Parlament i Kosovës, n Qeveri dhe Presidenc, tashmë i kanë harruar zgjedhësit e tyre, pasi mendjen e kanë tek koalicionet për grabitjen e pushtetit!

Shkruan: Florim Zeqa

Me vota t'miletit deri tek tagjija e pushtetit

Nga legjislatura e parë e Kuvendit të pasluftës e deri më sot, e njëjta simfoni po luhet në Kuvendin e Kosovës! Dakordim dhe ç'akordim për interesa personale, kacafytje dhe shtyerje me bërrylla, sharje dhe fyrje sa për t'a trullosur popullin kinse e kanë hallin e tyre, dhe me të përfunduar Seancat e Kuvendit të gjithë bëhen bashk në grazhdin e pushtetit.

Fajet nuk i kanë këta që lujnë 'çoke' me fatin e popullit, por ata që po i votojnë të njëjtët grindavec dhe yryshnik të pushtetit, që për interesa të pushtetit, lërë që harrojnë miq e shoqëri, e harrojnë edhe 'nënën parti' që ua mbushi grazhdin me ndihmën e popullit të mashtruar në vijimësi!

Deputetët me votën e popullit 'Tempullin e Demokracisë' e kanë kthyer në Koleseum të kontaminuar me gas molotovi, me gjuhë rrugaqërie të përballjes së egër politike për llogari të liderëve partiak.

Vërtetë është paradoksale qysh nuk u mbushen mend një herë kjo popullatë e mjerë që ju besojnë aq lehtë rrenave të politikanëve mashtrues!

Kështu, nga njëra palë zgjedhje në tjetrën po votojnë për t'zezën e shtetit dhe t'vetes së tyre!

Sa kalon koha e tagjisë, pason koha e harresës kolektive

Për habi, përseri të njëjtët njerëz votojnë për të njëjtët njerëz!

Por, edhe ka vite që të njëjtët njerëz nuk votojnë më për asnjë subjekt shkaku i rrenave të politikanëve dhe katandisjes së tyre morale!

Si pasojë e kësaj, deputetët veteran janë duke i zënë frymën parlamentit dhe proceseve demokratike në veçanti. Të tillët janë duke i penguar reformat brenda partive politike dhe reformës zgjedhore në pergjithesi!

Tashmë kanë kaluar dy dekada që nga zgjedhjet parlamentare të vitit 2004, që ata që qeverisin me vendin nuk e kanë legjitimitetin e plotë shkaku i mosdaljes së elektoratit në zgjedhje!

Zgjedhjet e fundit parlamentare të 9 shkurtit 2025 shënuan rekordin e rënjes elektorale. Shifrat flasin për vetëm 40 % të qytetarëve me të drejt vote që kanë marrë pjesë në proces zgjedhor!

Edhe pse kjo është situatë tepër shqetësuese, deri më tani asnjë liderë partiakë dhe asnjë subjekt politik nuk po e ngrit zërin e ndërgjegjës për mungesë legjitimiteti, por turr e vrap drejt grazhdit politik!

Megjithatë, nga minoranca e daljes në zgjedhje do të nxjerret mazhoranca e pushtetit për qeverisjen antidemokratike dhe jo legjitime me vendin!

Në secilin vend të lirë dhe demokratik, kur zgjedhjet bojkotohen nga 60 %-shi i popullatës, zgjedhjet shpallen të pavlershme!

Në rastin konkret, kur lideri i partisë më të madhe zgjedhjet i shpalli 'Referendum Popullor', gjëja e parë duhej bërë pas humbjes së 'Referendumit' duhej të ishte dorëheqja apo tërheqja nga gara për formimin e qeverisë, për ta respektuar vullnetin e shumicës (60 % përqindshe) në kuadrin e 40-shit të dalë në zgjedhje!

Nëse ndokush nga popullata nuk e di ta bëjë dallimin mes zgjedhjeve dhe referendumit, le ta pyesin njeriun që i thirri në referendum!

Unë më 1 Shkurt, pra një javë para zgjedhjeve, përmes shkrimit analitik ju pata paralajmëruar se 'Referendumi nuk kalon'!

Meqenëse tek ne nuk vlen asnjë kriter dhe as një normë morale, 40 përqindëshi e më pak se kaq do të qeverisë me vendin deri në zhbërjen e çdo vlere njerëzore dhe parimi bazik të demokracisë!