Blerim Latifi: Të prehesh në varr me emrin e armikut në gur

Të prehesh në varr me emrin e armikut në gur

Nga Prof. Blerim Latifi

Në afërsi të Drenasit, në qoshen e një are, ndodhej një varr i vetmuar. Me dekada ai varr kishte një emër zyrtar: Varri i partizanit të panjohur.

Në ditët e festave jugosllave aty shpesh vendoseshin lule nga nxënësit e shkollave dhe recitoheshin vargje për Titon pranë tij.

Në komunën e Drenasit kishte një shkresë për mbrojtjen e këtij varri dhe tregimin zyrtar për të. Por ky tregim ishte krejtësisht i rremë. Njeriu që prehej në atë varr nuk ishte ndonjë partizan i panjohur, i varrosur nga shokët e tij në natën e 21 shkurtit 1945, kur u shua Kryengritja e Shaban Polluzhës. Njeriu që prehej në atë varr ishte vetë i biri i tij, Tafa, i cili ishte vrarë gjatë daljes nga rrethimi në kullat e Dvoranëve. I plagosur ditë më parë në Betejën e Urës së Pestovës, Tafa do të vazhdonte t'i qëndronte pranë babës së vet deri në çastet e fundit.

42 vjet më pas, kur regjimi komunist po jepte shenjat e rënies, "Varri i partizanit të panjohur" e mori emrin e vërtetë të tij: Varri i Tafë Shaban Polluzhës. Më pas eshtrat e këtij kreshniku do të zhvarroseshin për t'u varrosur në Polluzhë pranë babës së tij.

Ky është tregimi për një luftëtar të madh, që për 4 dekada qëndroi në një varr me emrin e armiqëve kundër të cilëve luftoi deri në vdekje.

_________

Thënë të drejtën disi po më pëlqen fakti se SHBA nuk e përfshiu BE-në në negociatat me Rusinë për Ukrainën. Kët' ndjesi pëlqimi po ma prish veç anashkalimi i Britanisë së Madhe.

Një BE që s'është në gjendje tash e 17 vjet me mbyllë kontestin e Kosovës me Serbinë, e meriton të injorohet.

Një BE që nga një projekt bashkimi kombesh, është kthy në një mekanizëm bllokimi, të cilin anëtarët e saj e përdorin për interesat e tyre mesnike.

Një BE që e do sigurinë gratis nga Amerika dhe njëkohësisht edhe tregtinë me rivalët e saj tregtarë, si Kina.

Një BE që ledhaton nji cub ballkanik si Vuçiqi dhe s'është në gjendje t'i bindë pesë shtete të saj se Kosova nuk mund të kthehet më nën Serbinë. Etj, etj.

_________

Me 1912 na e përgjysmuan ëndrrën për të qenë një komb i lirë në mesin e kombeve tjera. Do duhej të kalonte gati një shekull që gjysma tjetër e ëndrrës të bëhej realitet.

Kohët po ndërrojnë, kombet sërish po i kthehen vetes. Kjo do të thotë se horizonti i bashkimit kombëtar sërish po hapet për ne.

Gëzuar Dita e Pavarësisë së Kosovës!

_________

Çdo popull ka parlamentin që e meriton. Kjo do të thotë së deputetët nuk janë vetëm përfaqësuesit e tij politikë, por edhe pasqyra kulturore dhe mentale e tij. Këto janë caqet e zgjedhjes së tij. Nuk di ma mirë, e mbase edhe nuk do ma mirë. Kaq është kjo punë.

_________

T'jemi të qartë në një pikë: një popull që çon analfabetë në Parlament, s'meriton as respekt as qeverisje të mirë.

_________

Zhduket gjuha shqipe nga tabelat e autostradave në Maqedoni. Qysh ka thanë një herë dikush: Mjafton një gjeneratë e mbrapsht që të shkatërrohet ajo që është ndërtu me mundin e shumë brezave!