Fatmir Halimi: Zekerija Idrizi - Portrete shkrimtarësh

LIBRI ”PORTRETE SHKRIMTARËSH” I AUTORIT ZEKERIJA IDRIZI ËSHTË NJË ENCIKLOPEDI PËR LETËRSINË SHQIPE

NGA MA. SC. FATMIR HALIMI

Shtëpia botuese ProkultPress  nga Prishtina nxori nga botimi me mjetet e veta materiale, në qindra kopje, librin ”Portrete shkrimtarësh” të shkrimtarit, filozofit, studiuesit të letërsisë, teologut, z. Zekerija Idrizi.

Botuesi Fatmir Halimi duke e parë se autori Zekerija Idrizi është një gjigant i shkrimit dhe i publicistikës sot, se Zekerija sot është një kokë gjeniale e kombit tonë, se Zekerija Idrizi sot  është njeriu më prodhimtar në letrat shqipe, vendosi që ta përkrahë me botimin e librit “Portrete shkrimtarësh”. Zekrija Idrizi nga Shkupi i Maqedonisë Veriore, e që jeton në Berlin të Gjermanisë ka në dorëshkrim me dhjetëra libra për botim , andaj ne kërkojmë nga shtetet tona si nga Shqipëria, Kosova dhe Maqedonia e Veriut që ta përkrahim financiarisht për botimin e librave këtë kolos të letërsisë dhe këtë kolos të kombit tonë.

Libri “Portrete shkrimtarësh” i Zekerija Idrizi është një enciklopedi më vete pasi që në të janë të përfshirë të gjithë shkrimtarët e letërsisë shqipe, kudo që ata veprojnë e punojnë, duke përfshirë Shqipërinë, Kosovën, Maqedoninë e Veriut, Malin e Zi, pra edhe diasporën shqiptare si Evropën Amerikën e largët e të tjerë.

Në këtë libër janë të përfshirë më shumë se tre qind poet e shkrimtarë. Shkrimtarë që krijojnë letërsi kryesisht pas luftës së Kosovës, ose më mirë të themi shkrimtarë të shekullit XXI.

Për librin sa ishte në dorëshkrim kanë shkruar recensione më shumë se dhjetëra kritikë e krijues, e që në vazhdim po paraqesim vetëm disa pjese të shkrimeve të tyre:

“Nga leximi dhe studimi që i kam bërë zhvillimit të mendimit botëror, në përgjithësi, dhe të atij shqiptar, në veçanti, kam hasur në faktin që çdo revolucion shoqëror, shkencor e kulturo-qytetërues ka enciklopeditë e veta me anë të të cilave vendos piketat e rrugëtimit të tij drejt shtigjeve të progresit të gjithëmbarshëm. Ky rrugëtim veçanërisht është nisur në epokën e revolucionit francez, kur Didero dhe shumë kolegë të tij nxorën një enciklopedi që pati ndikim të madh, si në Francë, ashtu edhe në Evropë. Më pas ky ndikim u shtri në të gjithë botën. Një revolucion të tillë në botën shqiptare e filloi edhe rilindasi famëmadh Sami Frashëri, duke botuar enciklopedinë e tij gjashtë vëllimore me titull “Kamus-ul-alam”.         
Në këtë rrugëtim kaq sublim ka udhëtuar edhe z. Idrizi përmes shkrimit dhe përgatitjes tashmë për botim të kësaj vepre me vlerë dhe peshë studimore, publicistike e letrare.   
Thënë me një fjalë, libri “Portrete shkrimtarësh” është një enciklopedi e mirëfilltë që botës shqiptare i ka munguar.” thotë shkrimtari dhe studiuesi nga Struga, Prof. dr. Bexhet Asani.

Kurse Bilall Maliqi nga Presheva shprehet kështu: “Jo më kotë thuhet se shkrimtarët janë pasaporta e një kombi dhe identiteti ynë, prandaj kjo na jep të kuptojmë se sa e madhe dhe sa e gjerë është kultura dhe letërsia jonë kombëtare dhe me këtë lexuesit, si dhe unë, mësojmë për disa krijues më pak të njohur në gjeografitë shqiptare, sepse për disa pena të njohura kemi mësuar në shkolla e në studime, por për gjeneratën pak më të re, lexuesit kanë pak njohuri, sidomos për biografitë e tyre, prandaj kjo penë e njohur ka bërë një punë shumë të madhe që këta krijues, që frymojnë brenda kopertinave të këtij libri, si botim i veçantë, t’i kenë si pasuri bibliotekat tona dhe rajonale, si dhe t’i kenë në duar lexuesit brez pas brezi.”

“Së fundi, duke mbartur në koshiencën e tij një tjetër ide, mendim që tashmë u përkthye në një punë impenjative, z. Idrizi ka ecur ngadalshëm, me shumë vullnet e përkushtim dhe me punë sistematike studimore në rrugëtimin e jetëshkrimeve dhe veprave të shkrimtarëve për të mbledhur nektarin e portretit të tyre e duke e përmbledhur në librin “PORTRETE SHKRIMTARËSH” si një dëshmi që do t’i vijë në ndihmë mbarë shqiptarisë, veçanërisht dashamirëve të letërsisë, studentëve dhe studiuesve të saj.   
Në këtë vepër kapitale z. Idrizi na njeh me figura ikonike të poetëve, studiuesve, kritikëve, mësuesve, publicistëve, përkthyesve, duke na prezantuar një stil unik me segmente përshkruese-detajuese.”. shkruan zonja e letrave shqipe, Emine Boriçi- Kritike letrare.

Pra së fundi presim nga institucionet tona që ta përkrahin këtë enciklopedi për letërsinë tonë dhe vetë autorin e saj Zekerija Idrizin , në mënyrë që pena e tij të mos ndalet së shkruari.

Urojmë që libri ta gjen secilin lexues dhe njëherit të zgjoi edhe kërshërinë e kritikës letrarë në të gjitha trevat tona.