Blerim Latifi: Aty ku punohej e luftohej për Kosovë e Shqipni

Prof. Blerim Latifi:

Filozofi gjerman Martin Heidegger, në një intervistë të tij, thotë se nga përvoja njerëzore dhe historia e dimë se çdo gjë thelbësore dhe madhështore buron nga fakti se njerëzit kanë një atdhe dhe janë të rrënjosur në një traditë.

Afrim Bunjaku kishte një atdhe dhe ishte i rrënjosur në një traditë të madhe, në traditën e Bunjakëve të Samadrexhës, të cilët ishin gjithmonë aty ku punohej e luftohej për Kosovë e Shqipni. Prandaj edhe ai ishte aty ku ndodhi 24 shtatori i vitit 2023. Për të mbetur emri dhe imazhi i asaj dite.

_____________

A ju kujtohet kryetari i nderuar i Suharekës Bali Muharremaj kur mundohej me një rrametë dushku me i shu flakët që kishin përfshi komunën e tij?

Kështu edhe kryeministri Rama me një gotë ujë nga tryeza modeste shpirtërore e Bektashizmit shqiptar, po do t'ia mësyj për t'i shuar flakët gjigante të ekstremizmit fetar në botë.

Përfundimisht Kadare kishte të drejtë kur Ballkanin e quante një zonë që prodhon donkishotë për metër katror më shumë se çdo vend tjetër i botës.

_____________

Mohikani i fundit i rëndësishëm i teorisë marksiste, Frederic Jameson, paska vdekur. Veprat e tij të shumta, që për fokus kryesor kanë marrëdhëniet komplekse midis ideologjisë, artit dhe kulturës, pas rënies së komunizmit kanë shërbyer si një lloj ngushëllimi teorik për intelektualët e deprimuar dhe militantët e shkapërderdhur të hipotezës komuniste.

Tekstet e tij të thukta dhe me ndikim mbi estetikën janë përpjekje e sofistikuar për të ngritur një teori marksiste mbi kulturën e artin përtej skemës klasike të determinizmit ekonomik. Një përpjekje e tillë ka qenë në thelb të krejt Marksizmit perëndimor, i cili aspironte që ta bënte përmes teorisë kritike atë që se bënte dot përmes aksionit politik.

Jameson jetoi gjatë, sa për ta parë vjetërsimin e kësaj teorie dhe pafuqinë e të Majtës për të ofruar një alternativë të re dhe të besueshme ndaj kapitalizmit liberal dhe kapitalizmit të ri shtetëror në shekullin 21.