Blerim Latifi: Bukëpërmbysës!

Prof. Blerim Latifi:

Brenda një kohe të shkurtër:

Një shqiptar i arabizuar kapet duke organizuar një masakër në koncertin në Vjenë të yllit botëror të muzikës, Taylor Swift.

Një shqiptar tjetër i arabizuar tenton të kryej sulm terrorist në një stacion policie në Gjermani.

Një shqiptar tjetër i arabizuar arrestohet në Gjermani për predikime wahabiste dhe dënohet me dëbim për në Kosovë.

Krejt këto, ta theksojmë, brenda një kohe të shkurtër.

Dhe hala të habitur pyesni se pse Perëndimi ka fillu me na shiku shtrembër.

Hala s'keni pa kurgjë, more të mjerë!

Hala s'keni pa kurgjë, more bukëpërmbysës!

__________

Në shoqnitë fisnore barra e përgjegjësisë bie mbi fisin. Atij i përkasin sukseset dhe dështimet, shpërblimet dhe dënimet, e mira dhe e keqja.

Në shoqnitë religjioze përgjegjësia supreme i përshkruhet Zotit. Sukseset shihen si dhurata të tij. Dështimet e gabimet si ndëshkime prej tij.

Në shoqnitë liberale ndodhë diçka tjetër: është individi konkret njerëzor ai që ka përgjegjësinë për pasojat e veprimeve të tij, qofshin ato suksese, qofshin dështime e gabime.

Arsyeja pse shoqnitë liberale kanë prodhuar transformimet e mëdha të modernitetit, zhvillimin e tij ekonomik, social e kulturor, qëndron pikërisht te ky model përgjegjësie. Dhe tek shmangia e këtij modeli po ashtu ne gjejmë shkakun themelor të dështimit të shoqnive për t'u zhvilluar e përparuar.

__________

Njerëzit që në kohë zgjedhjesh flasin për historinë, në fakt tregojnë se sa indiferentë janë ndaj problemeve konkrete të së tashmes dhe sa pak kanë për thënë për të nesërmen.

Njerëzit që në kohë zgjedhjesh e bëjnë temë kryesore Serbinë, në fakt tregojnë se nuk e kanë asnjë ide konkrete qysh me ndalë spastrimin demografik të Kosovës, që nxitet nga ekonomia e keqe; as një ide konkrete qysh me shëru sistemin shëndetësor, që me "sëmundjet" e tij vazhdon me eksportu jashtë pacientë dhe personel mjekësor; as një ide konkrete qysh me ndalë procesin e shndërrimit të të rinjve të këtij vendi në një masë fanatikësh e analfabetësh funksionalë; as një ide konkrete që e bën politikën diçka më shumë se një garë të thjeshtë grupesh për t'i zënë disa poste në strukturat e shtetit.

__________

Një federatë e korruptuar e futbollit. Lojtarë që vizitohen tek fallxhorët ( hoxhallarë që shkruajnë hajmali dhe të ashtuquajturit mjekë popullorë, që në fakt janë mashtrues).

Më falni, por mjaftojnë këta dy faktorë që dështimet në futboll të listohen njëra pas tjetrës.

Futbolli historikisht ka qenë dhe mbetet një sport europian. Prandaj për t'ia dalë në kët' sport, duhet mentalitet modern europian. Nga fillimi në fund. Gjithë kohën.