Sevdail Hyseni: Adresa

Sevdail Hyseni

Satirike

Adresa

Viti i Ri, po ecën

Lirshëm pa ndalesa,

Mediat e Luginës...

Janë me dy adresa.

Të parën prej kohësh

E kanë në Beograd,

Kurse këtë të dytën

Në Prishtinë, me fat!

Kanë dhe një tjetër

Për aq sa e lyp puna,

Kur e humbin rrugën

Kthehen në komuna.

Disa nga gazetarët

E them pa rezervë,

Me një fjalë e japin

Kaun për konservë.

Joshen pas parasë

Kasnecë dhe telallë,

Fondet që i marrin

Nuk i kanë hallall.

Me këto përfitime

Këta zëra publikë,

Do t’i bien daulles

Me valle e muzikë!

Kjo vegël muzikore

Me dy pëlhura top,

Njëra dorë me guxhë

E tjetra me shkop.

Me nder, ku mbetet,

Misioni i gazetarisë?

Bukur e thotë populli:

- Luja guxhën daullxhisë!