Cikël poetik nga Suzana Kuqi

Lypësi i vogël

Duar që zgjaten
gishtërinj që mardhen
filiza dhëmbjeje të mpirë...

Sy që kalojnë
sy që shohin vetëm duar
më jep të të jap
asgjë nuk fal...
vetëm duar
nuk shikojnë sy...

nëse do t'i shihnin
do t'u jepnin veç bezdi
si kripa e detit
mbi xhama të pistë...

kush ka nge
s'të jap, po s'më dhe...

një pikëlz loti
ulëret uri
në veshë të shurdhër
në sy që s'dinë të shohin
sy...

dhe lotin
nga dhëmbja e zhveshin
e bëjnë
veç një pikë ujë e kripë...

bota ka frikë
të mbytet në ata sy...

Nentor 2008

Mos më lër të pres

Mos më lër të pres
se edhe koha vdes...

krijesa që lindin e vdesin
dhe qelizat e trupit tonë
kushedi sa mijëra
në një sekondë
një flutur
veç një ditë jeton
një lule
në mbrëmje vyshket...

edhe lëkura ime fishket...

mos më lër të pres...

... koha jonë vdes
ashtu në pritje...

Deti sot

Pashë detin e tërbuar sot
gjigant valësh
zemërim zbardhur
erën që e xhindoste
s'e kapte dot
me egërsi
i shfryhej tokës...

Imperia 1 dhjetor 2008

Duke larë pjatat

Duke larë pjatat në mbrëmje
bashkë me ujin
rrëshkasin
dhe mbresat e pashijëshme
të ditës
ndonjë batutë pa kripë
një buzëqeshje hipokrite
pastaj mbetet uji i ngrohtë
i pastër
u vë rregull mendimeve
Fshij,
gotat shkëlqejnë,
ndoshta,
nesër do të jetë
kohë me diell
Mbyll, shkoj të fle
këmbët zbathur mbi tapet
ndjej
se si një gjethe
bjen
mbi tapetin e ditëve të shkuara
të tjerat,
mbi degët e pemës
së ditëve
me një mangut mbeten

...në kufirin e ditë natës...

Mesazhi

Dhe shiu braktisi
trishtimin e tij
nga ritmi monoton dritareve
trokitur
ish veç zbrazje e mallit
të qiellit
për tokën dashuri zhuritur
vesa e lotëve të mi
mbi petale shprese...
ka ende mirësi
në dy rreshta shprehur
jam mirë...
dëshëroj të jeni mirë...
pikat e shiut
ndërruan ritëm...

Imperia 3 Nentor 2008

Ty me njëqint merita...

Ti , njeri
me njëqint merita
që i numeron pa u lodhur zerot
pas njëshit
njëshin e kemi të përbashkët
të qenit njerëz..

Tek rrufit kafenë
duket sikur mua
por në fakt
u buzëqesh atyre

lum ti , qofsh i bekuar
buzëqeshjen
kam humbur
diku... dikur...
kur fillova të mos
shoh më engjëj
por njësha
me zero prapa
e vendosa t'i ndjek...