Zemra Shqiptare

  https://www.zemrashqiptare.net/


Enver Bytyçi: Faleminderit Senator Bob Menendez!

| E marte, 23.05.2023, 06:55 PM |


Faleminderit Senator Bob Menendez!

Nga Enver Bytyçi

Paraqitja në senatin amerikan të dy përfaqësuesve të DASH, zotit Collet dhe Escobar, zbuloi alternativën më dobiprurëse e të drejtë për Kosovën, si dhe paqen e stabilitetin në rajon. Ishte kreu i Komisionit të Jashtëm të Senatit, senatori Bob Menendez, ai që kërkoi publikisht që “të mos i bëhet presion Kosovës”! Eshtë kjo një kërkesë e vazhdueshme e njerëzve me logjikë e racionalë. Vetëm kryeminitri I Shqipërisë është shfaqur në të kundërtën: - Vazhdimisht ka kërkuar që të mos i bëhet presion Serbisë! Ndërkaq vetëm disa orë pas përfundimit të këtij ballafaqimi në Senat, presidenti Biden e zevendësoi zotin Escobar me një diplomat tjetër karriere.

Se BE dhe disa diplomatë amerikanë, si Grenell, Palmer, Escobar e madje edhe Christopher Hill i kanë bërë dhe i bëjnë Kosovës dhe qeverisë së saj një presion të jashtëzakonshëm, kjo është një temë e trajtuar gjerësisht në mediet tona. Por me këtë rast dua të them një të vërtetë tjetër: Ambasadorët amerikanë në Kosovë kanë qenë më të matur dhe më të rezervuar në presionet e tyre ndaj institucioneve të Kosovës. Kanë qenë gjithnjë më të durueshëm dhe kam përshtypjen se kur ata u kanë kërkuar liderëve kosovarë të shtyjnë vendime a diçka të tillë, këtë e kanë bërë shumë herë me qëllimin e mirë që jo vetëm të mos destabilizohet situata, por edhe që Kosova të mos gjendet keq përballë aleatëve.

Ndërkaq senatori Menendez është më i qarti, më seriozi, më i drejti, më I arsyeshmi ndër të gjithë ata që kemi dëgjuar deri më sot. Deklaratat e tij për asosacionin dhe trysninë që i bëhet Kosovës si palë e dobët janë ndihma më e çmuar që vjen në një kohë shumë delikate dhe kthese në historinë e Kosovës. Ai thotë troç, se ka frikë që asosacioni mund të jetë në modelin e një Republika Srpska. Dhe nuk heq dorë nga ky konstatim, edhe pse Escobar triblon, kur thotë se kemi këtë ose atë qëllim. Kur krijohen asosacione me autonomi territoriale për serbët në Kosovë, nuk kanë rëndësi qëllimet e reklamuara. Madje shpallja e tyre mund të jetë një intrigë “garancie” pa garanci. Edhe pse me shkrim, po shohim se çfarë garancie përbën letra e ish-të ngarkuarës për Siguri e Politikë të Jashtme në Europë, Frederica Mogherini, drejtuar ish-kryeministrit, Isa Mustafa.

Paralel me debatin në Senatin Amerikan erdhi hapja të dielën e shkuar e stërvitjes Defender 2023, në të cilën Kosova radhitet si shteti i katërt për numrin e pjesmarrësve në këtë stërvitje. Defender 2023 përfshin shumë vende anëtare të NATO-s dhe udhëhiqet nga SHBA. Forcat e Armatosura të Kosovës përfaqësohen me 1400 pjesmarrës, gjë që shihet si vlerësim për kapacitetet mbrojtëse të vendit. Në këtë stërvitje qartësisht jepen dy mesazhe: Së pari se NATO është e vendosur ta mbrojë Kosovën përballë kërcënimeve serbo-ruse. Dhe së dyti, se vetë Kosova është tashmë një vend i pavarur dhe i lirë të vetëmbrohet. Edhe kjo stërvitje e asocuar me Departamentin e Mbrojtjes së SHBA-ve, dëshmon se Amerika nuk është vetëm Grenell, Palmer, Escobar e Hill!

Serbët u ankuan me këtë rast. Thanë se as KFOR-i nuk i kishte njoftuar se në territorin e tyre, të cilin ata e quajnë “Serbia Jugore“, do të zhvillohet një stërvitje e tillë. Madje thanë se në ankesën që bëjnë po thirren në Rezolutën 1244. Kjo do të thotë se nuk kanë kuptuar as sot pas 13 vitesh që Gjykata Ndërkombëtare e Drejtësisë në Hagë më 22 korrik 2010, kur njohu shtetësinë e Kosovës, tha se „Pavarësia e Kosovës nuk bie në kundërshtim me Rezolutën 1244“! Fakti që NATO nuk është konsultuar e madje as nuk ka njoftuar Beogradin për këtë stërvitje flet shumë. Përmes kësaj Perendimi ka dhënë mesazhin e qartë: Nuk do të diskutohet me Serbinë për integrimin e Kosovës në NATO.

Të gjitha rrethanat e sotme shkojnë në favor të pozicionit të Kosovës në dialogun me Serbinë. Këtë mesazh dhe sinjal duhet ta lexojë kryetari i shtetit, zonja Osmani, kryeministri Kurti, kryeparlamentari Konjufca, si dhe opozita e Kosovës. Sidomos kur është fjala për krijimin e Asosacionit të Komunave me Shumicë Serbe. Menedez na ka dhënë një armë të pakundërshtueshme për këtë. Flisni me zërin e tij, sepse zërin e Kosovës nuk duan ta dëgjojnë në Bruksel. Merreni edhe stërvitjen Defender 2023 si inkurajim për këtë. Po ashtu shfrytëzoni arritjet e Kosovës për të imponuar zgjidhjen e drejtë. Ky është avantazh i madh! Avantazh i krijuar nga vetë lidershipi i Kosovës dhe nga miqtë e saj të vërtetë. Mbrojeni pra Kosovën përmes gjithë këtyre avantazheve. Askush nuk mund t’ju akuzojë për “anti-amerikanë”! As disa opozitarë, shërbëtorë të Beogradit!

Eshtë koha që Kosova të imponohet, por jo duke ikur! Duke qenë alternativë në zgjidhjet që kërkohen nga Perendimi e njëkohësisht duke ruajtur dhe mbrojtur shtetësinë, pavarësinë, tëritorin dhe sovranitetin!

Dhe në çdo hap që bëhet duhet t’i përulemi Senatorit Bob Menendez, t’i falemi atij që na u gjend pranë në këto ditë të vështira! Faleminderit Senator Bob Menendez!