Gëzim Ajgeraj: Miglima vargjesh me mall

Gëzim Ajgeraj

Gëzim Ajgeraj

MIGLIMA VARGJESH ME MALL

 

1.

Ç`trazim fjalësh

Kësaj nate vonë

Ndjenjë mëmëdheu

 

Milingona vargjesh

Më zgjojnë etjen

 

Ç`pikëllim mërgimi

Ra mbi letër

 

Digjet balli i vargut

 

2.

Në kopshtin e dhimbjeve

Çdo ditë bie shi

Me pika mëmëdheu

 

Janë lotët e mallit

Shkunden retë e udhëve

Mbi ylberet e largësive

 

Etja shuhet

Përmallimit

 

3.

Çdo ditë shaloj

Kuajt e mallit

E i përcjellë tek ti

 

Krelave të tyre

U lidh gërshetat e të falave

 

Mallëngjimin

E vesh si dhëndërr

Ylbereve të kthimeve

 

Sa larg më je ti

 

4.

Prapë po bie shi

Mbi lirikë

 

Nëpër mallin e vargut

Vërshojnë pikat e fjalëve

Tek struken strehës së përmallimit

 

Sa i pa fat o varg

Që u shkrove mallëngjimit

 

5.

Sonte ti përkëdhela muzgjet

Miglimave të errësirës

             Mblodha kujtimet

E i përqafova me mall

 

Sa e zjarmishme erdhi mbrëmja

Në restorantin Helvetia

 

6.

Humbellave të udhëve

Aromë harrimi

Ç`largësi në mes

 

Vetëm ylberet e kujtimeve

Nisen plotë mall

Ëndrrave të sfilitura

 

Largësia frynë

Harrimit

 

7.

Nga vorbulla e ikjeve

Po derdhet kupa e mallit

 

Ylberet e ikjeve

Anojnë kthimeve

Shalojnë shpresat

 

Heu....

Udhës s`po i duket fundi.