Edmond Shallvari: Heej, të rinj!

Edmond Shallvari

Heej, të rinj! (1)
 
Pardje isha sa ju
Tëpkë, në mos më i ri
Sa them se ai jam un’
Se shpirtin e kam si ai!
 
Pardje ëndërroja si ju
Tëpkë, në mos më mirë
Dhe sot ëndërroj më shum’
Se kam në shpirt rininë!
 
Pardje do mbetet pardje
Dhe unë bashkë me të, ai
Po pse ende vazhdoj të ndjej
Atë që ju jetoni tani?
 

Heej, të rinj! (2)
 
Sa unë do jeni pasnesër
Tëpkë, në mos më shumë
Se mua ca borxhe më mbetën
Nga koha kur borxhli s’isha unë!
 
Si unë mos qofshi pasnesër
Pasnesër mos qoftë pardje, as sot
Mos paçi si unë borxh të vjetër
Mos iksha pa e shlyer këtë borxh!