Mihal Gjergji: Balil-o, Balil Nuri!

Mihal Gjergji

BALIL-O, BALIL NURI!

(Balil Neshës)

Kujen hap Janina

e ka mbytur gjaku

Kal’ i zi i vdekjes

roje bën te pragu

Ja dhe Kserovalta

më përtej Guveri

Qafë e Peshkëpisë

ndizet si ylberi

Soset Balil nuri

zbret nga Kurveleshi

Trimat pas e ndjekin

derdhen si rrebeshi

Udhën hap me supe

ngjeshur jataganin

Fustanin hajduçe

krahëve-xhamadanin!

Një pasha me tuje

e fut tek tabuti

Një tabor nizamësh

e zhurit baruti...

Ke një plagë te sisa

t’a ka puthur plumbi

Bën sikur do shtrihesh

po s’të qaset gjumi

T’u ndez fustanella

brezin t’a këputi

Me gjyle të rënda

të qëllon harbuti

S’të malakset këmba

gjuri s’të gremiset

Burri vdes në këmbë

shembet, po s’vithiset

Një mjegull e bardhë

zbret nga Këndrevica

Të ta lidhë një plagë

dorën zgjat Nivica

Sa mbyll’ sytë, del nëna

Vjen të shuaj mallin

Qënka yll’ i fatit

zbret e të puth ballin

Të të marrë tek gjiri

Krahët hap Xhixhiá

Po ti, feks si drita

Balil - bukuria!

Rrobat palë-palë

treten në sepete

Asnjë lot rubini

s’e mbajte për vete!

Krah me Tafil Buzin

edhe Hodo Beun

Si foshnjën në djepe

ngarkuat atdheun!

Rri në ballë të kohës

roje istikami

Të na bëjë rrëmujë

prapë na ndjek Junani.

Ndaj të pret Janina

pak më tej Preveza

Qyqe-Çamëria

veshur me të zeza!

Qershor 2020