Baki Ymeri: Mërgimi i ëndrrave

Baki Ymeri

Nga Baki Ymeri

Pas antologjive poetike Altri Mondi dhe Tensione sentimentale, këto ditë, në editurën prestigjioze Do-minor, e pa dritën e botimit në Bukuresht edhe simotra e tyre,  Exilul viselor/Ekzili i ëndrrave, duke patur për ideator Mardena Kelmendin, ndërsa konsultentë të librit Dr. Thanas Gjikën, Vitore Stefa Lekën dhe Dr. Engjëll Koliqin. Edhe ky libër del në të dy gjuhët (shqip/rumanisht), nën përkujdesjen e Shoqatës së Gruas Italo/Shqiptare Camminiamo Insieme/Ecim së Bashku dhe Redaksisë së revistës Albanezul/ Shqiptari, me një parathënie brilante të poetit të madh shqiptar, Visar Zhiti. Lëndës poetike me mazhorancë shqiptare dhe minorancë të huaj u paraprin poezia Shqiponjat, e shkruar nga poetesha rumune Emilia Dabu në shenjë solidariteti me luftëtarët e lirisë, NATO-n dhe Amerikën që dhanë kontribut për çrobërimin e Kosovës nga gjenocidi serb (1999) .

Shqiptarët, sipas autorit të parathënies, janë në një udhëtim të madh. Të paduruar tani që Evropa të vijë sa më parë tek ata, një pjesë kanë ikur ta gjejnë ata sa më parë Europën. Nuk është fjala thjesht për kontinentin e vjetër, se trualli i shqiptarëve në Europë është i patjetërsueshëm aty, por nënkuptohet dhe metafora e Europës së qytetërimit dhe mirëqenies, e vlerave dhe e virtyteve, e thënë hapur, e Poezisë. Që kapton dhe në kontinentet e tjera, në Amerikë, po dhe në Azi e Afrikë, edhe në Australi, kudo ku kanë mbërritur shqiptarët. Dhe, siç thamë, udhëtimin e tyre edhe ata e shoqërojnë me këngë.

Bij të gadishullit më poetik, me fqinjë grekërit, prej të cilëve kanë marrë shumë, ku besoj, se s’kanë dhënë më pak, me sllavët e Jugut, që ndajnë dhe me ta mite dhe legjenda të përbashkëta, me rumunët, që i lidh një bashkëpunim brilant rilindë, shqiptarët, tashmë në dy shtete, në Shqipërinë e lashtë dhe në Kosovë, në Republikën më të re në botë, në Maqedoni dhe në Mal të Zi, me një diasporë më të madhe se veten, duke pasur përballë dhe Italinë, porta e Evropës për ta, duan të jenë dhe janë copëz e kulturës së përbashkët të njerëzimit, ku më e rëndësishme se multikulturalizmi është bërë interkultura, të përfshirë dhe ata në këtë lëvizje, ku duan të shpalosin veten, duan të marrin botë, por edhe të japin. Dëshmi është qoftë dhe një antologji e tyrja, thekson ndër të tjera parathënësi i librit, Visar Zhiti.

Ballina e librit Ekzili i ëndrrave

Dikush mund të mahnitet duke parashtruar pyetjen si është e mundur që në Bukuresht dhe provincë të dalin rregullisht libra dhe artikuj që afirmojnë vlerat shpirtëtore të kombit shqiptar. Përgjigja është e thjeshtë dhe pa konotacione vetëlavdërimi: mundohemi të ndjekim shembujt e shenjtë të rilindësve tanë, duke e braktisur, madje, edhe jetën private. Po e përfundojmë këtë paraqitje të shkurtë me disa perla lirike të shkëputura nga antologjia Ekzili i ëndrrave.

SHQIPONJAT / VULTURII

 

Vetishëm mbi zemrën time vinte dimëruar

Gji i lumturisë nga hyjnitë lakmuar

Ky pah i praruar mbi engjëj po binte

Mbi shtigjet e çastit përjetësi absolute.

 

Kosova e trishtë si vullkan shpërthente

Zemra shakmisej nga shkrepjet  e djeshme

Amerika rizgjohet  të bëjë drejtësi

Të djeshmen për ta gjetur në vërtetësi.

 

I love you - të thuhet se je i zënë

Përrallat qenje mbitokësore t’u bënë

Mrekullia e jetës reket të jetë anuluar

Qenje hyjnore me të shenjtën jetë

për atdhe flijuar.

 

Në botë ekzistojnë luftëtarë të së vërtetës

Krenaria e tyre pret vendimet tona jo lutje

Të plagosur nëse jeni nga ngjyrat e vjeshtës

Nderoni së paku fluturimin shijoni dashurinë

Forcën e madhe që ju sjell fuqi absolute.

(1999)

         

Emilia Dabu (Rumani)

 

 

JASEMINI I KOFSHËS SATE

 

Unë as që i kam larë sytë në këtë

mëngjez, i trembur mos të degdisem detrave

shëmbëlltyrën tënde të dhembshme,

të mos mbetem i braktisur nga iluzionet dhe lëndinat.

As trupin s’e kam shpërlarë nga djersa e dashurisë

sate, i ndrojtur të mos mbetem pa veshje

mbretërore.

 

Duke folur për ty, duke i rrëfyer botës,

në horizontin e mavijosur të lotit tënd zhys një anije,

një pallë të prehtë nga gjaku im i trishtë,

nga jasemini i kofshëes sate.

 

Aurel Sibiceanu (Rumani)

 

ZJARR I FIKUR

 

Jehojnë

Prej hapsirave të pafund të së shkuarës

Melodi e harruar

Kujtime

Të një kohe të lumtur

Flakërime

Të një zjarri të fikur

Që kërkon të shkundet

Prej gacës së fundit

Për të gjallëruar vetminë e madhe

Para përqafimit të mynxyrtë

Të errësirës

 

 Lek Pervizi (Belgjikë)

 

 

 

NË KËRKIM TË NDERSHMËRISË

 

U lodha

Në kërkim të ndershmërisë

Në tregti

Gjeta njëfarësoj vërtetësie

Në dashuri -

Sa për të zënë sytë

Në politikë -

As një majë thoi.

 

Jorgo S. Telo (Shqipëri)

 

Ekzili i ëndrrave

Vetëm Unë dhe Ti

Remzi Basha (Suedi)