Florim Zeqa: Cila do të jetë gëlltitja e radhës e Albin Kurtit?!

Cila do të jetë gëlltitja e radhës e Albin Kurtit?!

Shkruan: Florim Zeqa

Anipse Federata e Boksit e Kosovës që nga viti 2014 është anëtare me të drejta të plota në Federatën Botërore të Boksit, boksierët kosovarë nuk u lejuan që të udhëtojnë dhe marrin pjesë në Kampionatin Botërorë të Boksit të mbajtur në Beograd nga 24 tetor deri më 6 nëntor 2021, vetëm pse ishte logoja e Federatës së Boksit bashkë me logon e Republikës së Kosovës në uniformat e tyre. Urdhëri i ndalimit të boksierëve kosovarë në pikëkalimin në Merdare nga autoritetet serbe ishte i qartë dhe i prerë, Serbia nuk e njehë shtetin e Kosovës dhe simbolet e saj.

Kush e thotë se Albin Kurti është i pathyeshëm!?

Tashmë të gjithë e kemi të ditur që Albin Kurti nuk e vuri fusnotën, mirëpo dihet botërisht që Albin Kurti gjersa ishte në opozitë, fusnotën* e quante ‘tradhti shtetërore’, kurse dje e përfaqësojë Kosovën në mbledhjen e Këshillit të Stabilizim-Asocimit me të njëjtën fusnotë*! Pra në takimin me drejtuesit më të lartë evropianë, kryeministri ynë e përfaqësojë shtetin me fusnotë* dhe jo me emrin kushtetues Republika e Kosovës!

Pra të gjithë e dijmë kush e solli fusnotën, sikurse qe i mbajmë mirë mend edhe deklaratat e Albin Kurtit si opozitarë për fusnotën*, i cili përveqse e kundërshtonte fusnotën*, i quante tradhtarë ata që përfaqësonin Kosovën me këtë fusnotë*!

Si ta quajmë tani Albin Kurtin që e bëri të njëjtën gjë!?

Ku mbetën parimet dhe premtimet e Albin Kurtit?!

Siq dihet Albin Kurti erdhi në pushtet me premtime të mëdha ndaj qytetarëve. Nuk do të bëjë dialog me Serbinë pa njohje paraprake dhe se dialogun me Serbinë do ta ketë prioritet të gjashtë, e ktheu në prioritetin numër 1. Premtimin se kur të vie në pushtet do ta heqë fusnotën, jo vetëm që nuk bëri përpjekje për ta heqë atë, u bë pjesë e ‘tradhtisë shtetërore’, duke u ulur në tavolinën me mbishkrimin KOSOVO*!

Tashmë ka filluar ta kuptojë Albin Kurti, se jo vetëm fusnota* apo “fluska e sapunit” e Edita Tahirit, por edhe marrëveshjet paraprake të dëmshme dhe antishtetërore të nënshkruara nga pararëndësit e tij (Thaçi e Mustafa) në Bruksel nuk mund të ndryshohen aq lehtë siq e kishte menduar (pa 2/3 e votave në Kuvendin e Republikës së Kosovës)!

Por kryeminsitri i vendit tim është dashur ta kushtëzojë pjesëmarrjen në këtë takim me heqjën e fusnotës në mbishkrimin KOSOVO*, respektivisht me vendosjen e emrit kushtetues Republika e Kosovës, ndryshe nuk arsyetohet më asgjë ky lëshim i Albin Kurtit!

Qoftë edhe më kushtin për liberalizim të vizave për qytetarët e Kosovës, Albin Kurti nuk është dashur të ulet si “skifter” pas fusnotës* së vënë nga BE-ja!

Duhet kujtuar se edhe marrëveshja për targat nuk flet për një marrëveshje ndërshtetërore ndërmjet Kosovës dhe Serbisë, por si marrëveshje mes Beogradit dhe Prishtines për CCP (Common Crossing Points) apo për pikat e përbashkëta të kalimit. Ndryshe i bie që në marrëveshjet e Albin Kurtit me Aleksandër Vuçiqin nuk përmendet fare Republika e Kosovës.

Mirëpo shumë shpejtë (para kohës së paraparë) edhe marrëveshjes për targat i erdhi përfundimi në mënyrën më qesharake “u hargjuan stikerat”!

Bëni çka t’iu themë unë, por mos bëni çfarë bëjë unë!

Edhe një herë po i kthehem fillimit të shkrimit. Me rastin e ndalesës së boksierëve kosovarë në pikën e kalimit në Merdare, autoritetet serbe i kishin kushtëzuar ata që t’i heqnin uniformat me mbishkrimin Republika e Kosovës nëse dëshirojnë për të vazhduar tutje rrugëtimin drejt Beogradit, mirëpo një gjë të tillë nuk e bënë pasi nuk deshën ta mohojnë identitetin shtetërorë të tyre.

Vlenë për të cekur se, për këtë veprim ishin mbështetur edhe nga kryeministri Albin Kurti, por kur i erdhi radha këtij të fundit që ta dëshmojë veten, ia bëri sikur klerikët fetar; “bëni çka t’iu themë unë, por mos bëni çfarë bëjë unë”, duke e gëlltitur fusnotën* sikur të ishte akullore!

Gëlltitja me kaq lehtësi e fusnotës* nga kryeministri ynë i lë rrugën hapur gëlltitjes së radhës e cila padyshim do të jetë akoma më e mundimshme, por e arsyetueshme në të njëjtën mënyrë “lirinë nuk ua solla unë, e gjeta në mesin tuaj”!

Deklaratat e guximshme më pas në konferencë shtypi me përfaqësuesin e lartë të BE-së, Josep Borrell, nuk e arsyetojnë gabimin fatal të Albin Kurtit më fusnotën*.

Ata që gabimin e shohin gjithmonë diku tjetër e asnjëherë të vetja, mbesin gjithmonë të papërmirësueshëm! Mosmbajtja e premtimeve elektorale dhe gabimi në veprime, janë duke e kthyer Albin Kurtin në mashtrues të qytetarëve të vendit. Liderët populist u ngjajnë daullëve, edhe pse lëshojnë zë të fuqishëm, nga brenda janë të zbrazët!

Albin kësaj radhe i zhgënjeve të gjithë, edhe kundërshtarët politikë!

P.S. Kryeministër i vendit tim, Albin Kurti, do ta keni mbështetjen time në mbrojtjen e parimeve dhe premtimeve elektorale lidhur me dialogun, fusnotën*, asociacionin dhe çka do tjetër që ka të bëjë me luftimin e korrupsionit dhe krimit të organizuar, por mos e mendoni se do t’iu kursej me kritika për çdo lëshim apo mosmbajtje të premtimeve me të cilat ua more votën qytetarëve të vendit tim.