Stavri Risto: Mirmëngjes njeri!

Stavri Risto

Mirmëngjes njeri!

1.

Më thoni një përrallë siç më tregonte nëna

Dhe buzëqeshjen e saj më ofroni tek më nanuriste,

Dhe unë në mes të acarit të dimrit

Do t’u dhuroj lulet dhe kopshtet më të bukura

Të pranverës së përrallave!

2.

Unë jam gënjeshtra!

Ti je premtimi!

Jemi pa fat,dhe ti e di përse..

Ndaj,

Hapi perdet e dhomës së mbyllur

Hidhi sytë lart,larg,përtej shatërvaneve,

A e shikon gjëkund heroin?!...

3.

Mos u mashtro nga sjellja e mirë e Bobit!

Lëri paratë!

Poshtë borselinove fshihen mendime çnjerzore!

Lypësi është më fisnik!

Në barrakat me llamarina ngrihen ëndrra rrënqethëse,

Me shumë yje

Me shumë diej!..

4.

Boll i zhgënjyem njerzit!

Turmat janë të rrezikshme kur nisin të lëvizin!

Ylli i spektaklit ku luajnë putanat

Mund t’ua ngatërroj marshimin drejt statujave...

Dhe ahere,mjerë ju!...