Kalosh Çeliku: Thirrje telefonike pasmesnate

THIRRJE TELEFONIKE

PASMESNATE

 

NGA KALOSH ÇELIKU

 

(Patat e egra dalin

nëpër Qytet)

 

Patat e egra dalin nëpër Qytet

E kalojnë Urën e Gurit.

Sorrat e zeza pas tyre grupe - grupe

Ferexhenë hedhur krahëve.

 

Pyetja: Ku i kemi gjelat e Katundit

Këngën e tyre, para agimit mbi gardh?!...

 

 

(Sot nuk kam blerë lule

për Ditën e Grave)

 

Sot, nuk kam blerë lule Kopështi

Për 8 Mars. Ditën e Grave.

Shkaku, se: Nuk kam kujt t’i dhuroj lule

Festa është bërë patetike. Vdekjeprurëse

E Unë e dua Lindjen. Lulet mbi varre.

 

Sot, nuk kam blerë lule Kopështi

Për 8 Mars. Ditën e Grave.

Arsye, se: Sot, Gratë vetë janë lule

Vetëvetja natyrore: Dy shtamba me verë.

 

Nesër, të vdekurit t’i ngrejnë nga varret...

 

 

(Thirrje telefonike

pasmesnate)

 

Moti kohë nuk kisha qenë në Vendlindje

Edhe: i vizitova familjen. Livadhin Pukoshta.

Vendin e kullosës së lopëve. Sot, që Shteti

Ende nxirrte qymyr druri. Unë desha, mu në atë vend

Kutadi, pas kaq viteve arratisje nëpër Atdhe

Themele të shti, vikend shtëpi. Ik nga qytetërimi.

 

Shkaku, se: Pavetëdije, Shteti kishte krijuar liqe

Jetesë. Gjelbërim. Peshqi e bretkosa guak-guak.

Që, në fëmijëri tek Livadhi përpara Shtëpisë

Pasdarke, me këngë më venin në gjumë.

Hite të cilat nuk i kisha dëgjuar tridhjetë vite

Paprtimas, i dëgjova te Gani Xhafolli, në Prishtinë.

Dhe, përçudi, mbi livadhet e Babait. Fushës Kërçovës

Sugari i tij, sot deshi të ndërtoj vikend-shtëpi.

 

Natën e kalova me Xhangon. Rakinë e rrushit

Edhe me Piktorin Bektashi të Baba Tomorrit.

Again e Çelike, që ia kishte djeg stanet Lugati

Premtimet e tij për Takimet poetike nën Rrap:

Nesër, qengjat në vend të ujkut do t’i hanë poetët.

Kushëririn, që posa kishte ardhë nga Zvicra

I armatosur me dy “kashikara” raki rrushi.

Pasmenete, macja e telefonit ma prishi gjumin.

E prita disa minuta, nuk u lajmërua Qyqja.

 

Ditën e nesërme, persëri më mori në telefon

Edhe, kësaj radhe nuk e rrëfeu veten. Zërin.

Pas pak kohe, po i njëjti numër i panjohur

Përjashtim, u dëgjua një zë gruaje e përgjumur

Zëra fëmiu në dhomë për ankesa dite. Heshtje.

 

E fala qyqen. Thirrja, a m’ë erdhi nga varret

Apo, nga Katundi. Shkaku, se: xhindet rrëzë Çukës:

Gjithë natën, dikur më kishin hudhur dorë më dorë

Majë shelgjeve. Lisave. Çati më çati me këngë.

E në mëngjes, më kishin kthyer mes Nanës e Babait.

 

Mesditë, më  rrahu Nusja me pashterkë të kuqe...

 

 

(Nesër)

 

Edhe, e vrisni mendjen për mua si Poet

Nesër, a do të jem nën Rrap? Hije.

Jo. Unë do të jem para dy shtambave me verë

Mikes azgane. Dhe, dy “kashikarave” me raki rrushi.

 

Këmbëkryq nën Rrap. Roje te pragu i Shtëpisë…