Miradije Gashi: Jam gjuha e truallit tim

MIRADIJE GASHI

JAM GJUHA E TRUALLIT TIM

Tridhjetegjashtë shkronja

Si tridhjetegjashtë rreze

Me mua flasin

Në mua ndrijnë.

Të plotë Atdheun

Në shpirt ma sjellin

Janë vetë drita e syrit tim.

Po ç'gjuhë e shenjtë

Vallë është kjo gjuhë

Që nga unë nuk ndahet shqim?

Është kjo gjuhë e Mëmëdheut

Gjuhë e lashtë

Sa vetë drita

Me të linda

Qesha, qava...

E me të u rrita

UNË JAM GJUHA E TRUALLIT TIM.