Florim Zeqa: Vazhdon shkolla shqipe në Treviso

Vazhdon rrugëtimin shkolla shqipe në Treviso

Hapet edhe një paralele e mësimit plotësues

Shkruan Florim Zeqa

Edhe pse kohë e pushimeve verore, për mësuesit e shkollës shqipe në Treviso aktivitetet nuk kanë të ndalur. Pas përfundimit të suksesshëm të vitit shkollor të paraleles në Paderno (TV), koordinatori i shkollës shqipe, profesori Beqir Cikaqi, nuk e mendon të ndalet me kaq !

Ideja për hapjen edhe të paraleleve të tjera të mësimit plotësues në gjuhën shqipe në Provincën e Trevisos ka filluar të bëhet realitet.

Të dielën e kaluar me 05.07.2015, në Quinto (TV), u mbajt mbledhja konstituive për hapjen e një paralelje edhe në këtë lokalitet të populluar me bashkatdhetar të shumt nga Kosova dhe nga viset tjera etnike shqiptare.

Përgaditjet për mbajtjen e këtij takimi kishin filluar javë më parë nga profesori Bajram Desku, (ish profesor për afro 10 vite në QAMO "Ligj Gurakuqi" në Klinë (Kosovë).

Ideja e përbashkët e tre pishtarëve të arsimit shqip; e profesorit Bajram Desku, publicistit e veprimtarit Beqir Cikaqi (ish profesor i viteve të '90-ta në Suharekë) dhe e gazetarit e publicistit Florim Zeqa (ish arsimtar në Sh.f. "Azem Bejta në Grabanicë-Kosovë) u konkretizua me sukses të plotë. Kjo u arrit edhe falë vullnetit të bashkatdhetarëve,...prindërve të nxënësve që shfaqën dëshirën dhe gadishmërinë për sjelljen e fëmijëve të tyre në mësimin plotësues të shkollës shqipe këtu në lokalitetin Quinto (TV).

Në këtë mbledhje konstituive u zgjodh këshilli iniciativ në këtë përbërje; Florim Zeqa, Bajram Desku, Bekim Spahiu, Nazim Morina dhe Jeton Elshani.

Koordinator i paralelës së mësimit plotësues në gjuhën shqipe në Quinto u emërua profesori Bajram Desku, i cili u zotua se me përkushtim dhe profesionalizëm do t'i qaset punës për hapjen e  kësaj paralelje. Fillimisht profesor Desku do të filloj bisedimet me autoritet italiane, ato qeveritare (komunale) dhe joqeveritare (bashkësinë fetare në këtë lokalitet) si dhe me drejtoritë e shkollave për sigurimin e lokalit për mbajtjen e mësimit plotësues të gjuhës shqipe.

Këshilli iniciativ gjatë ditëve në vazhdim do të intensifikoj punën për regjistrimin e nxënësve për vitin shkollor 2015/2016, për përpilimin listës së nxënësve në mënyrë që në kohën e duhur të bëhet kërkesa tek Ministria e Arsimit për ABETARE-et dhe materialeve tjera didaktike të nevojshme për zhvillimin e procesit edukativo-arsimor.

Rrethë kësaj çështje u zotua se do të përkujdeset koordinatori i mësimit plotësues të gjuhës shqipe në Treviso, profesori Beqir Cikaqi.

Në mbledhjen konstituive, pos tjerash u vendos që gjatë pushimeve verore në vendlindje, këshilli iniciativ të realizoj një vizitë në Ministrinë e Arsimit në Prishtinë, për t'i njoftuar autoritet vendore me aktivitetet e sipërpermendura si dhe për të shprehur nevojën e zgjerimit të bashkëpunimit në fushën e arsimit, si formë dhe mundësi e vetme për luftimin e rrezikut nga asimilimi i gjeneratave të reja, të lindura në Diasporë.

Po ashtu në mbedhjen konstituive u muar vendim, që në pragë të fillimit të vitit të ri shkollor, të mësimit plotësues të gjuhes shqipe të mbahet edhe një mbledhje e zgjeruar me prindër të nxënësve, me qëllim të formimit të Këshillit të prindërve, si organizëm bazë për mbarëvajtjen dhe funksionimin e shkollës shqipe.

Sipas koordinatorit të shkollës shqipe, profesorit Beqir Cikaqi, pritet që gjatë vjeshtës të hapet edhe një paralele e re e mëimit plotësues në Conegliano (TV), për të plotësuar kështu kërkesat e një numri të konsiderueshëm të prindërve që janë të gatshëm të kontribuojnë për hapjen e një paralelje edhe në pjesën veriore të Provincës së Trevisos.