Ukshin Zajmi: Zë nga varri Çam

Zë nga varri Çam*

 

Nga Ukshin Zajmi

 

Shtatë  dekada,

Varri  ynë  heshti

-nuk priti lule nderi

e nuk iu fshi pluhuri.

 

Jemi shumë ketu,

disa u krijuam

nga natyra

disa nga dreqi Z,

në Paramithi e Filat,

e që n’ Gumenicë ka shtat.

 

Zëri, vie edhe nga Parga

Margëliçi, Konispoli

e nga shumë vende të tjera:

-Ejani o njerëzit e mij

ne po u presim

të çmallemi

për jetën e ndarë

70 vjeçare,

të flasim

për nipër e stërnipër

e të mësojmë

për fatin e fëmijëve tanë.

 

U tradhtuan

edhe vëllezërit tanë

“se feja krijon komb”,

e dikur

zotit i luteshim shqip.

As ata

te varri nuk na vijnë

por, shetisin bri nesh.

 

Bota ecën përpara:

-vëllëzërit do t’pendohen

dreqin Z do ta vras rryfeja

siç e vrau koha.

E miqtë,

do të kthejnë

në vend të vet

të përndjekurit,

për t’i vizituar varret

e për t’ua lehtësuar dhembjet.

…..

* Në bazë të statistikave që jep shoqata “Çamëria” në Tiranë, gjatë goditjeve që janë bërë në vitet 1944-1945, në fshatrat çame janë vrarë gjithsej 2771 civilë shqiptarë dhe konkretisht si më poshtë: në Filat dhe rrethinat 1286, në Igumenicë dhe rrethinat 192, në Paramithia dhe rrethinat 673 dhe në Parga 620. Janë plaçkitur dhe djegur 5800 shtëpi në 68 fshatra. Në një listë të hollësishme të humbjeve materiale përfshihen 110.000 dele, 24.000 bagëti të trasha, 250000 kv grurë dhe 80.000 kv vaj ushqimor, të cilat arrijnë në 11 milionë kg grurë dhe 3 milionë kg vaj ushqimor. Si rezultat i këtyre goditjeve, llogaritet që 28.000 çamë të jenë larguar për në Shqipëri, ku u vendosën në periferi të Vlorës, Durrësit dhe Tiranës.