Nebi Dragoti: Ajër Shqipërie

NEBI DRAGOTI

 

VERË, MOJ VERË, VALLEN NDIZE…

VERË, MOJ VER

 

Nipit tim, Klidit.

Verë, moj verë,

vallen ndize!

Gëzimin e fëmijëve

tunde kaltërsive!

 

Të zgjuar i kemi,

i duam të zgjuar,

Shqipërinë më të bukur

kanë për ta ndërtuar.

 

I kemi të shkathtë,

i kemi punëtorë,

Dheun e të parëve

e bëjnë madhështor.

 

Bota ta dijë:

rrojmë krenar,

në dheun flori

jemi shqiptarë.

 

 

QERSHORI GAZMOR

 

Tullumbacet ajrit ngrihen me dorë

qershori gazmor, gazmori qershor.

 

Fëmijët dehje gëzimi seç kanë,

si fluturat harbojnë në luadh.

 

Në liqenj, në dete, në lumenj

me not gëzimi shpërthejnë.

 

“Lamtumir, s’të harrojmë ty , shkollë,

përsëri me forca do të vimë në shtator.

 

Tullumbace gëzimi ngre  me dorë

gazmori qershor, qershori gazmor.

 

 

AJËR SHQIPËRIE

 

Në ajër,

në ajër të pastër

oksigjeni dlirësie,

ti dil!

 

Ujë,

ujë të freskët

në ar bjeshkësh

të pish!

 

Këtu ku rritesh,

rritesh i shëndetshëm

në ajër lirie,

në ajër Shqipërie.

 

Në ajër Shqipërie

me këmët në tokë,

me kokën në qiell

Ante, fis trimërie!

 

 

PRANVERË

 

Pranvera bleron,

pranvera shpërthen,

ujërat e kaltra

vërshojnë në bjeshkë.

 

Shpejton gjelbërimi

me të katra vrapon,

i tunden grigjës në qafë

zile, këmborë.

 

Ogiçi lozonjar

blegërin në mal,

hidhet , përdridhet

tamam si valltar.

 

Grigjat larushe

si bletë në lëndinë,

hënën në kroje

për qumësht e pinë.

 

Hënë në kroje

për qumësht e pinë,

këto vise manushaqe

fëshfërijnë, mërmërijnë.

 

Këto vise shqiptare

erëzojnë trëndelinë,

hapsirat e kaltra

dehur me blegërimë.

 

 

PASIONANT PYJESH

 

Pasionant pyjesh

i etur kam qënë;

në gjethe plepi

kam shkruar vjershë:

-Mos m’i prisni pyje!

kam thënë,

pyjet mbushur bilbila.

O, nëpër lisa

era të fërshëllej,

shkumbëzuar përrenjtë

fushave të zbresin

si pentagrame me zhaurimë.

 

 

DALLËNDYSHET

 

Dallëndyshet erdhën

me çvit, çvit muzikë,

ulen, ngrihen,

zgjojnë avllitë.

 

Lodrojnë nëpër tela,

lodrojnë nëpër pemë,

shigjet, pikiadë në hapsirë!

 

Mysafiret e shtëpive tona,

zonjëza krahë hapur,

ne krahët u hapim

ditëve gjithë gëzim.

 

Dallëndyshet erdhën

ngarkuar mbi krahë

na sollën pranverën,

apo na solli ato

e jona pranvera?!

 

Çerdhet kanë festë,

çerdhet nëpër streh

ua ruajmë ne.

 

Dallëndyshe përkëdhel,

dallëndyshe puth në gushë,

o ju gushëshkruara,

çerdhet ua bëj me vjershë.

 

 

KËTO LETRA

 

Kashtën e grurit,

kashtën e Kumtërit

si qumësht në fabrikë

letra ta bëjmë,

libra të shkruajmë

për ju , o fëmijë.

 

Pastaj ju në shkolla

mbi këto letra të bardha

shqipen të shkruani,

të shkruani esse:

-Nga prindërit servirur i kemi,

servirur nga ara…

 

 

VRAPO

 

Vrapo,

bëhu atlet,

sportist bëhu,

më shpejt,

më shpejt!

 

Vrapo,

se jeta thërret:

munde dembelizmin,

mendjen të shëndosh

ta kesh në jetë!

 

Nxito

në shkollë,

jeta e bukur

bukur të kërkon:

nxënës shëmbullor.

 

Vrapo, vrapo,

më shpejt, më shpejt,

me trupin drejt

ec përpara

gjithmonë!

 

Vrapo,

kënga në gojë

të jehojë lart,

larg;

Marsh!

 

 

ATJE

 

Atje

tek ara,

tek lopa,

tek delja,

të kemi përpara:

bukë,

qumësht,

mish

e djath

në tryeza(…)

rrush e verë.

Mos harro!

 

Ta presim mikun

gëzuar miqësisht.

Fort

të djersijmë

atje tek ara…

 

2014.