Përparim Hysi: Eh, dikur-dikur!

Trish me poezi lirike

 

Nga  Përparim Hysi

 

1. Eh, dikur-dikur!

 

Eh, dikur-dikur !

Dikur kur isha i ri

U bëra i tëri purpur

Se rashë unë në dashuri.

 

Dashurova atëherë një çupë

Që m'i kishte sytë të zi

Më qe ajo çupë për ta pirë në kupë

Pupu! Se ç'bukuri!

 

E shihja dhe tak më mbyllej goja

Katandisja tamam si thuthuq

Para saj gati më dol boja

Tek shkruaj dhe tani jam i "kuq"

 

Më skuqej fytyra nga turpi

Sikur ja: po bëja mëkat

Më skuqi dikur ajo çupë më skuqi

Mandej me të zura qiellin e shtatë.

 

2. Pse s'më shkruan?

 

Është pak të them:- Jam i mërzitur!

Se nuk e prisja që mos më shkruaje

Sa kam pritur! Sa kam pritur!

Aq sa kam një shpirt prej Saharaje.

 

Sikur në shpirt kam shkretëtirë

Se asnjë lajm dhe as mesazh

A mund vërtet të ndihem mirë

Kur oazi i shpresës u kthye mirazh?!

 

Ballë për ballë sikur i "hapëm letrat"

Dhe sikur shkëmbyem "kredenciale"

Po të lexosh  mirë nëpër rreshtat

Patjetër që do ndeshësh në to malle.

 

Malle se ne, pothuaj, shkëmbyemë tepsitë

Siç bëjnë gjitonë apo nikoqirë

Heshtja juaj sikur i prish "tapitë"

Dhe më thuaj kështu a mund të ndihem mirë?!!!

 

3. Zonjës IKS !

 

Në të fola  fare hapur

Nuk lashë vënd për aluzion

Se me grep më ke kapur

Dhe qeshë mbushur emocion.

 

Fjalën prite me të qeshur

Ashtu mushka i desh drutë

Shpresa ime mbetë e mekur

Sado flisje urtë e butë.

 

Urtë e butë e plot tigani

Siç thotë kohës fjala e lashtë

Mua mëdysh më ndahet xhani

Dhe ç'ka them, s'është kashë e lashë.

 

Ç'ka shkruaj, është e vërtetë

Shkelmin kurrë s'i vë miqësisë

Jam i çiltër, transparent

Pres përgjgje, Zonja IKS!

 

Maj 2014