Oralda Lahe: Shpirt i lirë

Oralda Lahe

 

Besëthyerit modernë

 

Besëthyerit e kohëve moderne

të etur deri në palcë

të çakorduar në vullnet

Plangprishës e ngatërrestarë

Besëthyerit pa fjalë e nishan

 

 

Cigare

 

Cigaren e fundit

ndezëm tinëz botës

E pimë fshehurazi syve

të grave xheloze

Pritëm me ankth muzgun

nga përgjimet e brishta

Heshtëm në të fundit përqafim

pa dashur të fshihemi

Me tymin e cigarit vizatuam sytë e

muzgut të fundit ...

Si një cigar i shkelur fshetas botës

pa ndenjë, shpirt e fjalë...

 

 

Pikturë e vjetër

 

Pikturë e vjetër në shtëpinë e vogël

të kujtimeve të largëta

 

Qëndron si një dëshmitare e hutuar

ende e brishtë

 

Kohë e largët në ditët

me shi

 

Pikturë e vjetër ende rri e ngrohtë

me ngjyrë si dikur

 

 

Shpirt i lirë

 

Vajtje-ardhje

si shpirt i lirë

Ikje-pritje në lumin e mendimeve

Më prit në këtë herezi me pritjet,

ardhjet dhe ikjet

Jam shpirt i lirë dhe ti e di

U bë vonë, orë pritjet e gjata të shpirtit të lirë...

Vajtje-ardhje në heshtjen e përbashkët

Shpirt i lirë në kufijtë e jetës

............................

Mos kërkoni të jem perfekt

nuk mundem dhe pse përpiqem

të sfidoj

Mos kërkoni të hesht kur nuk mundem...

se është hipokrizi

Mos kërkoni të trukohem, të jem në

qendër të vëmendjes për sytë e botës

Mos më lodhni me pyetje që nuk gjejnë

përgjigje dhe pse janë të mundimshme

Në përpjekjen për idealen gjej të thjeshtën

atë që prej kohësh kam kërkuar

 

 

Trishtim zemërthyer

 

Portën mbylla zemërthyer trishtimeve

therrëse

Klitha mbi fatin tënd femër e brishtë

9 muaj vuajtje për të ardhur

në jetë...

Urreva barrën e lodhjeve,

ankthin e rrugëtimeve

Mbylla portën dhe të prita

pas shumë lutjesh

Në fetusin e ngjizur nga dashuria

Të prita vajzë, u përcolle nënë

Tani je grua e rritur shtathedhur fsheh bukuritë

trupore

Ti vajzë, grua, nënë në 9 muajt e lindjes

dhe mëmësisë

........................

Bashkë  me erën iku dhe kjo ditë

Pemë e lashtë qëndron pa frikë

Bashkë me erën fshihen shtigjet e vjetra

Në ëndrrat e vjetra dhe fillimet e reja

Puhizë e lehtë e prekjeve fshehtas dukjes...