Lumturi Ymeri: Jeta në trekëndësh

LUMTURI YMERI

 

JETA NË TREKËNDËSH

 

Ekzistenca e jetës

përmes Dritës, Ujit, Ajrit

Nëpër kohë të Shkuar, të Tashme, të Ardhme

Të njeriut prej Gjaku, Mishi e Ashti

Në tru vizatuar Trekëndëshi…

 

Kauza e jetës

Provo! Zgjidh! Vërteto!

 

*

Provo, se vesa, lulja, gjethja,

sythi, loti, shiu, reja…

Krejt ngjyrat në natyrë

shëmbëllejnë me një fytyrë!

Provo të gjitha stuhitë

të dallgëve që ngrihen në shpirt,

që trandin e dhembin në zemër

mbartin vetëm një emër!

 

E vetmja ëndërr të ndjell

I vetmi yll që të ndez

Dashuria më sublime

drejt Altarit Hyjnor

të Bekimit, Betimit

zgjedhjes, Bashkimit…

 

*

Rrjedhin ujra ndër brigje vitesh

akuj dimrash ngrirë stalagmitesh

Zënë të kalben stinët

të veniten tingujt

zemra pa një dridhmë

fishkur në rutinë…

 

*

Ngecur në trekëndësh

rrëzuar në brinjë

kë’ndin, vërteto!

Bri’një, po a’jo!

Joshjet, prekjet, klithjet

brenda gjoksit fshihen

Ti, kufij që s’njeh!

As fjalën e Nderit

as gruan me Nder

njeriu modern

me trinin e shenjt’

moralin e çjerr…

Për hir të lirisë

prej marrë’zisë

e çmend’urisë

katetesh në flakë

që digjen si kashtë

zjarr pa prush, pa hi

veç tym që nxin…

 

*

Sa i rëndë Globi

ta mbash mbi shpinë

farën që mbolli

lypsarë e jetimë

Ndë ujërat e zeza

në koshat me plehra

vdesin abortet

me ulërimë…

 

*

Harrove , Njeriu modern,

se Toka e Qielli

Hëna e Dielli

Qëllimi e Njerëzimi

janë Një

që po çon dëm

në Big Bang!

 

E ndërtove trekëndëshin Njeri?!

Varu tani!!!