Demir Krasniqi: Tradhëtia nëpër shekuj

Demir KRASNIQI:

 

TRADHTIA NËPËR SHEKUJ

-Rapsodi satirike –

 

Nëpër shekuj t’ historisë ,

Në këto troje t’ Arbërisë ,

Pat shumë burra t’ shqiptarisë ,

Që i kanë bë hyzmet tradhtisë !

 

Që kur erdhën osmanlinjtë –

Për pak pare shumë janë shitë !

Seç po shtirej  Sharlatani –

Ma Sulltan se sa Sulltani !

 

Pëshpëriste  mixha Dulah :

“La ilahe ilallah ,

Hak Muhamed en Resulullah –

Unë jam turk – Elham Du Lilah !”

 

Predikonte Selameti –

Ma profet se Muhameti :

“Kush niset me shkua n’ Mekë ,

Po vdiq  rrugës – shkon n’ Xhenet !”

 

Kur erdhi n’ Kosovë , Serbia –

Prapë në këmbë u çuan hafija !

N’ çdo  mëhallë , qytet ,  katund –

Vullnetarë u bënë spiunë !

 

Për një pushkë , për një allti –

Shumë u shkruan për hafi !

Për me i hy n’ hatër hyqmetit –

Bënë zezë - ditën në mes vetit !

 

“Zdravo, zdravo Sllobodan ,

Gde si brate , dobar dan ?!

Boga mi , ti  kumo Petar –

Ja se stidim shto sam shiftar !”

 

“Tu ngjatë jeta Sllobodan ,

Ku je vëllaçko , mirë dita ?!

Pasha Zotin , kumbarë Petar –

Po m’ vjen turp që jam shqiptar !”

 

N’ komitet do zogj petrita –

Bëheshin ma komunist se Tita !

Ngrehte grushtin  Tafë Pelini –

Bëhej ma rus se Stalini !

 

Ligjëronte Mahmut  Barkësi  –

Bëhej ma Marks  se sa  Marksi !

Me fjalime  Elez  Qelbësi  –

Bëhej ma Engels se Engelsi !

 

Në kongrese fliste  Çerkini –

Bëhej ma rus se Lenini !

Për fëmijë t’ lindur , s’ kishin pelena  –

Pagëzonin djemtë : MARENGLEN – a  !

 

Nëpër trojet arbërore –

T’ gjithëve u ngritën përmendore !

Seç krekosej  Ali Bungu –

Ma kinez se Mao Ce Tungu !

 

N’ maje malesh , n’ brigje t’ lumit –

Ndihej kënga e Rapsod Shkrumbit :

“Enver Hoxha e Mao Ce Tungi –

Janë si buka prej një brumi !”...

 

E kur erdhi demokracia –

Ra çekiçi e ra kacia !...

Menjëherë i ndërruan pasqyrat –

Brenda natës i ndërruan fytyrat !

 

E hapë gojën Islam Çorapa –

Bëhet ma katolik se Papa !

Paraqitet Sherif  Valtoni  –

Ma amerikan se  Gjorgj Vashingtoni !

 

Gjilan, më 28.01.2014.