Thani Naqo: Përballë me lëmenj

Thani Naqo

PËRRALLË ME LËMENJ?

Ti s'ke si ta dish ç' është lëmi,

Strumbullari i drunjtë pse duket i artë.

Pse kuajt spërkatin me xixa kalldrëmi,

Pse qielli, dikur, ishte më i kaltër.

Ti s'ke si ta dish ç'ësht' ngarësi i kuajve,

Epoka e lëmenjve tani është fikur.

Ama, kokrën e grurit shkolitnin prej duajve,

Thundrat e atyre, që quhen krifëngritur.

Ti s' ke shijuar lëpjeta me gjizë,

As dhallë të ftohtë e lakror me rradhiqe.

Nafora, që ty, të japin në kishë,

Bekim i lëmenjve në mijra e mijra vite.

Ti s'ke si ta dish ç'është vrahtari,

Si pastron grurin me erën e mbarë.

Pastaj, për jastëk, një samar kali,

Të atyre kuajve që unë kam ngarë...

dhjetor 2013