Thani Naqo: Po qe se më ke fshirë nga kujtesa

Thani Naqo

PO QE SE TI MË KE FSHIRË NGA KUJTESA

Po qe se ti më ke fshirë nga kujtesa,

Gjer tani, kjo gjë, s'ka ndodhur me mua.

Më të bukur, se ç'ishe, të bëra me vjersha,

Më e bukura e ëndrrave të pa treguara.

Po qe se ti ma ke shurdhëruar hapin,

Hija ime ty s'të ndjek më nga pas.

Për hatrin tënd pa gjumë lashë fshatin,

Edhe qentë më donin e lihnin plot gas!

Po qe se ti ma ke harruar fytyrën,

Shikoje, në pëllëmbët e tua e ke.

Puthe, të përzjejmë për të fundit herë frymën,

Që unë mos plakem e ti të mbetesh e re.

Po qe se ti më ke fshirë vërtet nga kujtesa,

Edhe unë ty do të t' fshij pak e nga pak

Mos më shfaqesh më nëpër vjersha,

Në gjumë të thellë edhe qentë në fshat...

1978-2013