Ramiz Selimi: Në ketë fushatë po fluturon gomari!

Zgjedhë më të mirin nga të dobëtit, të dyshuarit, dallavergjinjët!

Në ketë fushatë po fluturon gënjeshtra, po fluturon gomari!

Shkruan Ramiz Selimi

„Vota është më e fuqishme se sa plumbi! Me plumb mund ta vrasësh armikun, kurse me votë mund ta vrasësh të ardhmen e fëmijëve tu.” Duke ju referuar kësaj thënie nga Abraham Lincoln,  them se populli më në fund duhet të pjekët për të zgjedhur më të mirët nga kandidatët e plogësht që kemi.  Më mirë të votohet, se sa të mos votohet,  për të mos e vrarë te ardhmen e fëmijëve.

Por, shtrohet pyetja a janë politikanët aktual të nivelit aq të mirë, për ta kuptuar drejt situatën e tanishme?  Mendoj që jo! Edhe pse ka lëvizje pozitive në disa parti me ofrimin e personave të kualifikuar, prapë dyshimet janë reale se në sipërfaqe mungojnë personat e vërtet, ata më shumë gjenden në prapaskenë. Vështirë se do të ketë ndryshime pozitive në vitet që vinë, politikanet e provuar kanë një sfond  veprimi shumë të errët,  kjo elitë e tanishme është testuar dhe provuar shumë herë? Ky është maksimumi çka mund të ofrojnë ata!

Por fatkeqësisht mu kjo elitë do ti fitojë prapë zgjedhjet, pasi populli akoma nuk është në nivelin e tillë demokratik për të dënuar shërbyesin kur ai e meriton. Shpesh po bëhet bashkëpunëtor në abuzime e manipulime për shkak të kësaj mungese dhe si rezultat po e vuan vet mbi supet e tij qeverinë e merituar.

Bashkimi Europian ju ka dhënë rëndësi të lartë këtyre zgjedhjeve, siç duket më shumë për shkak të bisedimeve me fqinjët verior, duke ofruar një numër të madh vëzhguesish dhe këshilltarësh në këto zgjedhje, për të rekomanduar  dhe imponuar drejtimin që duhet vijuar. Qëllimi kryesorë i tyre është përfshirja e komunitetit serb në zgjedhjet lokale, për të arritur  një pajtim të mundshëm me pakicën problematike, pa marr në konsideratë nevojat dhe dëshirat e shumicës. Të huajt testuan të gjitha pulset dhe nivelet e diturisë të politikës së tanishme. Ata e dine saktësisht së cilën barrë mund e bartin politikanët e vendit pa shkaktuar trazira në popull.

Cilat zgjedhje mbahen me 03 Nëntor!

Presidenti historik Ibrahim Rugova shpesh thonjte zërave që ofronin mendime tjera, se ne nuk duhet të startojmë çdoherë nga zeroja, puna e bërë duhet respektuar, idetë e mira duhet të vazhdojnë  mbi bazën e ndërtuar. Me të gjitha problemet dhe mangësitë qe ka shteti i ri, sistemi shtetëror ekziston, se sa respektohet dhe zbatohet ligji në jetë është një pyetje krejt tjetër. Shumica e partive kanë pasur pushtetin në dorë, si në nivel qendror ashtu edhe atë lokal. Neve elektoratit ne disa Komuna po na mbetet vetëm një mundësi, zgjidhe më të mirin nga të dobëtit, nga të dyshuarit, nga dallavergjinjët. Disa Komuna kanë ofruar kandidatë të shkolluar në perëndim, të cilët elektorati  duhet ti marrë shumë seriozisht, për të ju dhënë një mundësi përgjegjësie, në vërtetimin e vlerave të tyre.

Ato që i kemi vërejtur gjatë kësaj fushate për zgjedhjet lokale është se shumica e partive  janë duke menduar seriozisht për zgjedhjet parlamentare, të cilat mund të pasojnë në pranverën e ardhshme,  duke projektuar dhe ofruar elektoratit temat e politikës qendrore  në kontekstin lokal. Bie në sy edhe një pragmatizëm ekstrem qendror  nga lider të partive në direktiva dhe punë të pushtetit vendor. Se Kosova është shumë larg standardeve demokratike, po e tregojnë edhe këto zgjedhje. Liderët e partive duke njohur mentalitetin e elektoratit janë vënë ne lëvizje duke vizituar komuna, tubime dhe takime të ndryshme, për të mos dalluar janë këto zgjedhje lokale apo parlamentare. Si duket elektorati më shumë ju beson liderëve dhe jo personave kandidat për kryetar komune, të cilët duhej të ishin në qendër të vëmendjes.

Në kohëra të luftërave  dhe pas gjuetisë gënjehet më të vërtet nga të gjitha anët, në luftëra shpesh ju besohet për shkak të frikës që ekziston, por gjuetari gënjen vetëm nga dëshira për të treguar se sa shumë qëlloj sot. Tani që jemi mësuar me disa palë zgjedhje në tranzicion, politika është duke gënjyer fluturimthi, pa asnjë mbulesë,  nga dëshira për të kapur pushtetin, nga dëshira për të kapur paranë.

Premtimet e partive gjatë kësaj fushate kanë shkuar pothuaj se në ekstrem me paradokset e tyre, sa që Partia e Fortë na del parti me serioze duke treguar realitetin e tanishëm me humorin e saj. Premtimet pa asnjë bazë, pa asnjë mbulesë nga Partitë më shumë i ngjajnë lojës së fëmijëve: “Fluturon, Fluturon ...Lejleku;  Fluturon, Fluturon Gomari, ...Partia; Fluturon, fluturon... Paraja në xhep të politikanit, se sa një premtimi serioz për të nxjerrë vendin nga situata e vështirë ekonomike.

Themelimi i 70 Iniciativave i dëmshëm për popullin!

Se ne jemi vend i paradokseve tregon qartë edhe themelimi i 70 iniciativave qytetare nga Parti të ndryshme në shërbim të kryetarëve të komunave aktual. Themelimi i këtyre iniciativave  të shumta pa qëllime të qarta, do të jetë me pasoja për zhvillimin demokratik të vendit në vitet që vinë, pasi ato do të humbin kredibilitetin dhe besimin për të cilin janë menduar.   Tani për tani ato janë dorë e zgjatur e subjekteve të caktuara politike.

Atëherë kur partitë në pushtet për shkak të pakënaqësive largohen nga qytetarët, kur nuk ka angazhim të mjaftueshëm politik, lindin iniciativat qytetare. Qëllimi i tyre është të nxisin angazhimin politik në mposhtjen e antipatisë. Ato janë shprehje e ndërgjegjësimit në rritje të qytetarëve, zakonisht ato janë të orientuara në një çështje të caktuar. Në të shumtën e rasteve ato kanë neutralitet të rreptë ose kanë bashkëpunim me të gjitha partitë. Ato kërkojnë nga partitë gjetjen e mënyrave të reja të zgjidhjes së problemeve.

Por, tek ne problemi është se sa kanë ndikim partitë e pushteteve të ndryshme aty. Kjo në Kosovë nuk mund të anashkalohet, për arsye të rrethanave të ndryshme si ekonomike ashtu edhe mentale dhe pothuajse është e pa imagjinueshme që një iniciativë qytetare të funksionoj komplet e pavarur, ose njëkohësisht të bashkëpunojë me të gjitha partitë. Sikur iniciativa qytetare në Kosovë të jetë në shërbim të „fjalës së vet“ do t’a kishte vlerën e vërtet.

Zbatimi i detyrave në praktikë (tek ne) jam i bindur thellë se përcillet me sfida dhe plot vështirësi. Iniciativat qytetare sidomos në qeverisjen lokale përdoren si indikator për të vlerësuar nivelin e demokracisë dhe respektimit të ligjit në institucionet e shtetit (në botën demokratike). Nëse ato bashkëpunojnë vetëm me një parti, pra nëse përdoren nga pushtetet për të arritur qëllimin, ato janë shumë të rrezikshme sepse jo vetëm që u zgjasin jetën pushteteve, ato e vendosin edhe popullin në gjumë.