Shaban Peraj: Shqiptarët në Mal të Zi në udhëkryq

Shqiptarët në Mal të Zi në udhëkryq

Shkruan: Shaban Peraj

Prijësit politik shqiptarë në Mal të Zi  që nga fillimi i sistemit pluralist në vazhdimësi rreken të tregohen demokratë, por që në mungesë të seriozitetit dhe lakmisë për të zënë një vend në “qeverinë e dashur të tyre”, nuk merakosen për votuesit, nuk turpërohen për sjelljet dhe deklaratat  e tyre karshi komunitetit, duke vazhduar kështu me mashtrime e trillime të njëpasnjëshme. Sa e sa zgjedhje kaluan në këto vite të demokracisë, sa e sa premtime u dhanë për shqiptarët në Mal të Zi, qoftë në nivel lokal po edhe në atë shtetëror, dhe sa herë komuniteti i këtushëm u dha përkrahje për të drejtuar qeverisjen lokale e për të qenë të përfaqësuar në parlamentin malazez, asnjëherë nuk po shihet dritë në fund të tunelit, përkundrazi shqiptarët në Mal të Zi i ka  kapluar terri, i ka përfshi kriza shpirtërore, arsimore, kulturore e ekonomike. Ata që na përfaqësuan e këta që po na përfaqësojnë sot janë bërë tashmë qesharak ndaj opinionit të këtushëm. Si tu thuhet ndryshe kur asnjëherë, në asnjë rast nuk mbajtën premtimet e dhëna, nuk përfillën vullnetin e komunitetit shqiptar në Mal të Zi, çka dëshmon për mungesë të standardeve qytetare dhe kështu situata sa vjen e përkeqësohet gjithnjë e më shumë.

E vërteta është se prijësit e politikës shqiptare në Mal të Zi asnjëherë nuk realizuan qoftë edhe më të voglin problem të shqiptarëve të këtushëm, shembujt janë të shumtë dhe për problemet e krijuara nuk ka nevojë për kronologji historike. Ngjarjet e fundit në mozaikun politik për komunitetin tonë nuk kanë si ta lënë atë pa shqetësime e pa shumë pyetje: Çfarë bëhet sot  këtu, kush luan me fatin e votuesve, në emër të kujt dhe për çfarë? A thua vetëm për qëllime personale e për një karrige të zënë në parlamentin malazez? Publikisht duhet denoncuar prijësit e politikës shqiptare në Mal të Zi, të na thonë: Kur bënë analizë të përbashkët për gjendjen e shqiptarëve, kush i shtynë ata të mos merren vesh njëri me tjetrin për shumë probleme që kanë të bëjnë me jetën dhe standardin e komunitetit shqiptar në Mal të Zi? Pse nuk kanë strategji të përbashkët rreth projektit për komunën e Tuzit? Çfarë ndodh sot me pushtetin lokal të Ulqinit? Ku mbetën zgjedhjet e elektorëve për KNSH-në?

Rreth çështjes së projektit për komunë të pavarur të Tuzit ka deklarata nga më absurdet, politikanët shqiptar vrapojnë me deklarata sa qesharake aq edhe të neveritshme duke na shërbyer me thënie që “nuk i ha pazari”, në një kohë kur asnjëri prej tyre nuk ka qëndrim të subjektit që i takon, përkundrazi atë nuk e pyet askush dhe deklaratat personale të tyre bien ndesh me interesat e përgjithshme të banorëve të Malësisë.  Disharmonia politike vazhdon edhe në komunën e Ulqinit ku partnerët e koalicionit që qeverisin nuk mund apo nuk duan që për shumë çështje jetike për qytetarët të merren vesh njëri me tjetrin, përkundrazi, polemikat në distancë dëmtojnë akoma më shumë jetën e qytetarëve edhe ashtu të lodhur, humbin besimin se nga ky koalicion qeverisës lokal mund të pritet diçka më shumë. Një situatë absurde është edhe në Këshillin Kombëtar të Shqiptarëve në Mal të Zi. Strukturave udhëheqëse të deritashme ka kohë që u ka skaduar afati, ka pasur paralajmërime se së shpejti do të formohet udhëheqja e re, asgjë në këtë drejtim derisa të mos bëhen llogaritë matematikore, kush ku, cili do jetë i pari, e gjithë kjo për interesa personale nga lakmia për të zënë një karrige, e kurrsesi për interesa të shqiptarëve.

Pra, kush duhet të jetë në shënjestër të kritikës nëse jo prijësit politik  shqiptarë në Mal të Zi, sepse në vazhdimësi punojnë e veprojnë për interesa personale e në mungesë të aftësive politike. Zhvillimet politike të shqiptarëve në Mal të Zi nuk do duhej të varen nga këta politikanë sepse thjeshtë kjo nuk është pronë e tyre personale. Këta politikanë dhe partitë e tyre duhet të jenë vetëm administratorë për përmbushje të standardeve të qytetarëve dhe asgjë më shumë.   Nëse nuk arrihet që statusi për komunë të plotë të Malësisë të realizohet, atëherë nuk ka nevojë të mendohet kujt duhet drejtuar gishtin, nëse funksionimi i pushtetit lokal të Ulqin vazhdon kështu siç është me ujdisjet matematikore, nuk duhet besuar më askujt në sinqeritetin politik, përkundrazi, nëse KNSH-a nuk zgjidhet në një afat sa më të shkurtër, atëherë të gjithë aktorët e politikës shqiptare duhet të tërhiqen nga postet që mbajnë, të largohen për t’u dhënë shansin forcave të reja e kuadrove të dalluar që ata të punojnë me përkushtim e seriozitet në favor të shqiptarëve në Mal të Zi. Është e qartë se situatat ndryshojnë, por identiteti mbetet, mbetet ajo që është punuar në dobi të popullit, ndaj edhe premtimet duhet të mbahen, ndryshe të largohen, të japin dorëheqje nga parlamenti malazez e nga  “qeveria e tyre e dashur”  dhe fatin e tyre ta lënë në duar të votuesve, ata do dinë se kujt do t’ia japin besimin. Afatet u kanë skaduar.