Dibran Demaku: Dhuratat e Kryeministrit

DHURTAT E KRYEMINISTRIT

Nga Dibran Demaku

Kryeministri aktual i Kosovës, z. Hashim Thaqi, në historinë e vendit të vetë do të hyjë dhe do të përmendet si udhëheqësi që gjatë mandatit të tij qeverisës ka shpërndarë dhurata gjithandej.Dhe dhuratat e tij janë shumë më të vlefshme dhe më të rëndësishme se ta zëmë dhuratat e Babadimrit, apo se sheqerkat e Dajës! Dhuratat e kryeministrit janë dhurata politike me të cilat ai mëton që t`i përmbushë premtimet e tij elektorale, por që në një mënyrë apo në një tejetër emri i tij të hyjë në historinë e Kosovës!  Ai tashmë ka hyrë në historinë e Kosovës si Kryeministër që ka bërë shpalljen e Pavarësisë së Kosovës!  Së paku kështu tashmë shkruhet në të gjithë librat e historisë të shkollave fillore dhe të mesme të Kosovës!  Ai tashmë e gëzon këtë privilegj, sado që kryeparlamentari i Kosovës z. Jakup Krasniqi shpeshëherë e konteston të dhënën që z.Hashim Thaqi ta ketë bërë Shpalljen e Pavarësisë së Kosovës!  Sipas kryeparlamentarit Krasniqi, shpalljen e Pavarësisë së Kosovës e ka bërë Kuvendi i Kosovës, e meqë në atë moment historik ai ishte kryetar i Kuvendit apo Parlamentit të Kosovës, i bie që ai, pra Jakup Krasniqi ta ketë ka bërë Shpalljen e Pavarësisë së Kosovës!  Se sa ka të drejtë Krasniqi në deklaratat e tij, fjalën e vetë për këtë çështje duhet ta japin juristët! Sido që të jetë tash për tash merita e Shpalljes së Pavarësisë së Kosovës i është atribuar Kryeministrit Hashim Thaqi! Por, siç duket kryeministri aktual nuk është i kënaqur që në historinë e Kosovës të hyjë dhe të përmendet vetëm si Shpallës i Pavarësisë, por edhe si dhuratëshpërndarës gjithandej Kosovës!

Ai, pra, Hashim Thaqi për më pak se gjashtë vite si Kryetar i Qeverisë së Kosovës, popullit të saj ia dhuroi pesë Universitete dhe tetë komuna të reja, me synimet e tij se ai nuk do të ndalet me kaq! Nëse fiton mandat tjetër qeverisës ai do të vazhdojë me hapjen e Universiteteve dhe komunave të tjera?!

Hapja e një Universiteti kudo në botë sjell zhvillim dhe përparim!  Të menqurit kanë thënë se aty ku hapet një shkollë, mbyllet një burg! Andaj edhe hapja e Universiteteve në Kosovë do të duhej të ishte një lajm i mirë për të gjithë popullin e Kosovës! Vetëm dihet se hapja e një Universiteti bëhet pasi të jetë bërë studim i veçntë akademik, ekonomik e financiar! Hapja e vetëm një Universiteti ka një kosto financiare për qytetin dhe vendin ku hapet ai Universitet! Po hapja e pesë Universiteteve të reja për një vit, siç ndodhi në Kosovë çfarë kostoje do të ketë?!  Dhe atë jo vetëm kosto ekonomiko-financiare, por edhe kosto akadamike?! Lindë pyetja a ka staf të kualifikuar akademik Kosova për hapjen e njëherëshme të pesë Universiteteve?!  Apo, siç deklaroi kryeparlamentari i Kosovës, z. Jakup Krasniqi, se me hapjen e këtyre universiteteve, Kosova do të prodhojë anafalbet me diplomë Universiteti?! A nuk prodhoi Kosova, që pas luftës e këtej analfabetë me diploma të shkollimit të mesëm, por tash do të prodhojë edhe analfabetë me diplomë Universiteti?! ...Kështu disi u shpreh në Parlament, kryeparlamentari, z. Jakup Krasniqi, në ditën kur Parlamenti e votoi ligjin për themelimin e Universiteteve të reja në Kosovë!  Por, fatkeqësisht fjalës së kryeparlamentarit  nuk ia vuri veshin  askush dhe shumica e deputetëve e dha votën ashtu siç kishte kërkuar qeveria dhe kryeministri i saj?!

Pas krijimit të Universiteteve të reja, kryeministri dhe partia e tij në pushtet po vazhdon me krijimin e Komunave të reja!  Për çdo ditë nga kalon kryeministri dhe suita e tij, në mbrëmje qytetarët e Republikës së Kosovës dhe më tej, nga ekranet televizive do të mësojnë për formimin apo krijimin e atyre lokaliteteve si komuna të reja! Nëse vazhdon ky trend një ditë çdo fshat i Kosovës do ta ketë emrin komunë?!

Por, ani!  Në ato Universitete dhe komuna të reja do të krijohen vende të reja pune! Kështu thotë kryeministri dhe partia e tij! Pyetje tjetër është ajo se kush do t`i fitojë ato vende punë?! Përvoja thotë se ato vende pune do t`i fitojnë simpatizuesit dhe militantët e Partisë në pushtet! Kryeministri dhe partia e tij i kanë premtuar elektoratit zgjedhor se ata do të krijojnë vende pune për ata që do t`ua japin votën! Dhe pasi e kanë fituar votën e tyre, radha është tash e fituesve që t`i mbushin premtimet! Pasiqë nuk po mundin të hapin vende të reja pune në fushat e ekonomisë, industrisë apo edhe të bujqësisë, atëherë po hapin vende pune në administratë?! Vetëm se vendet e punës në administratë nuk prodhojnë asgjë vetëm e shpenzojnë buxhetin edhe ashtu të varfër të Kosovës!  E kujt i bëhet vonë se si do të shpenzohen paratë e buxhetit! Ata, që janë sot në pushtet e kanë ndarë mendjen që së pari t`i rehatojnë familjarët e vetë, pastaj simpatizuesit dhe militantët e partisë! Sepse shumë shpejtë vijnë zgjedhjet tjera dhe ata që nuk janë rehatuar mund të votojnë kundër!

Kështu dhuratat e Kryeministrit dhe partisë në pushtet vazhdojnë të shpërndahen pa dhimbje për familjarët, simpatizuesit dhe militantët e tyre! Sepse siç e thotë populli e mira e ka të mirën!  Ne sot atyre Universitete e komuna, ata nesër vota për ne?!  Po, për të tjerët?!  Për ata që nuk janë as anëtarë as simpatizantë e as militantë të partisë në pushtet?!

Ata le të ngrohen në diell! Edhe ashtu dielli i korrikut dhe i gushtit në Kosovë është shumë  nxehtë! ...