Dibran Demaku: Albin Kurti dhe Alma Lama

ALBIN KURTI DHE ALMA LAMA

Nga Dibran Demaku

Kur para tetë vitesh doli në skenë Lëvizja “Vetëvendosje“, e cila më vonë u shndërrua në parti politike, u besua dhe u shpresua se ajo do të sillte diçka të re edhe ashtu në skenën mjaftë të varfër politike në Kosovë. Të varfër në raport me nisma dhe ide kah e mira, kah progresivja! U besua dhe u shpresua se ajo do të ofronte një program ndryshe nga parrtitë politike të deri atëherëshme. Ky besim dhe kjo shpresë lidheshin me atë sepse shumica e anëtarëve të kësaj lëvizjeje e më vonë partie politike ishin të rinj. Besohej se „gjaku i ri“ thënë kushtimisht do të sillte diçka të re dhe të mirë për skenën politike dhe për vendin në përgjithësi.

Por, të gjitha shpresat dhe ëndrrat u zhdukën që nga momenti kur lëvizja apo partia“vetëvendosje“ u vesh me petkun politik dhe me atë petk hyri në Parlamentin e Kosovës. Themi kështu sepse lëvizja“Vetëvendosje“ e cila nuk ishte më lëvizje,por parti politike, përveq problemeve dhe ngatërresave, në jetën parlamentare, nuk solli asgjë të re! Ajo, pra „Vetëvendosja“ që nga hyrja në parlamentin e Kosovës solli probleme e ngatërresa nga më të ndryshmet! Mbase ajo këto ngatërresa dhe probleme i quan „risi“!  Kjo lëvizje apo parti që nga hyrja në Parlamentin e Kosovës diti që për gjithçka vetëm të kritikojë dhe të refuzojë! Thuase alfa dhe omega e veprimit të saj politik ishte kritika dhe refuzimi! Dhe përveq kritikës dhe refuzimit nuk solli asnjë alternativë tjetër!

Kryetari dhe deputetët e saj përveq problemeve dhe ngatërresave në Parlament, vazhduan me probleme, kërkesa e refuzime edhe nëpër rrugët e sheshet e Kosovës. Pamjet e shëmtuara  në ekranet e televizioneve të ndryshme ku kryetari dhe deputetët e saj konfrontoheshin me policinë e Kosovës,jepnin një imazh të keq në opinionin vendas dhe ndërkombëtar!

Kur kryetari i një partie i cili është edhe deputet në Parlament, i cili konfrontohet në rrugë me policinë e vendit të vetë ai nuk mund të quhet më as kryetar e as deputet!  Mbase kryetari i „Vetëvendosjes“ dhe deputetët nga radhët e saj e kanë kuptuar gabimisht demokracinë dhe ata mund të luajnë njëkohësisht  rolin e deputetit dhe të rrugaqit!  E dihet botërisht, se deputetët dhe rrugaqët nuk mund të bashkëjetojnë, që do të thotë nuk mun të jenë bashkë!

Kryetari i „Vetëvendosjes“ dhe deputetët e saj tërë veprimtarinë e tyre politike e kanë orientuar në lansimin e parullave të mëdha si ato të:“Bashkimit kombëtar“, „Bashkimit të të gjitha trojeve etnike shqiptare në një shtet“ e të tjera e të tejra!  Me këto parulla, ata tentojnë që ta ekzaltojnë dhe mashtrojnë kombin shqiptar dhe ata do të jenë në krye të politikës?!

Por, të gjitha parullat nammëdha sikur ranë në ujë nga „gafet“ e kryetarit të „Vetëvendosjes“ të lëshuara në një debat televiziv.Thëniet e ti në atë debat televiziv se ai është dakord që  femrat shqiptare duhet t`i kthehen mësimit fetar dhe shamisë  si në kohët e vjetra, e zbuluan katërcipërisht shpirtin dhe synimin e tij! Ai i cili me vite kishte deklaruar se ishte partizan i bashkimit të kombit shqiptar në një shtet dhe i prosperitetit të tij, me deklaratat e fundit i hodhi që të gjitha në ujë!  Sepse një udhëheqës politik i cili vepron që gjasmën e kombit(gjysmën e kombit e përbëjnë femrat) ta kthejë në të kaluarën e errët, vështirë se do ata besojë kush se ai është për prpsperitetin e atij kombi!

Me thëniet e tij në atë debat televiziv, Albin Kurti e rreshtoi vetën e tij krahas me të gjithë ata ekstremistët islamik shqiptar, të cilët me vetëdije apo pa të, Kosovën dhe shqiptarët duan t`i kthejnë prapa! Duan që Kosovën dhe kombin shqiptar ta rreshtojnë me vendet më ekstreme islamike sot në botë!

Kur kryetari i një partie politike deklarohet haptas se është për atë që femra shqiptare të mbulohet me shami që nga mosha e saj minorene, në emër të njëfar „nderi“ që e proklamojnë së fundi disa nga ekstremistët islamik shqiptar, çfarë mund të pritet nga të tjerët?! Thëniet e këtij „kryetari“ vertetuan atë frikën që ekziston tashmë në Kosovë, por edhe tek miqtë e tyre perendimor se Kosova po rrëshqet drejt ekstremizmit islamik! Nuk e kupton vallë ky „kryetar“se me ato deklarata të tij në favor të ekstremizmit islamik, i bën shërbim të madh politikës serbe e cila që nga përfundimi i luftës deklaron gjithandej se“ Kosova po shndërrohet në një shtet islamik , që do të jetë rrezik për civilizimin europian?! “

Mbase Albin Kurti deklaratat e tij në favor të ekstremizmit islamik nuk i ka bërë pa ndonjë interes! Ai e ka kuptuar tashmë se në mesin e popullatës shqiptare të Kosovës, ka aq shumë anëtarë dhe simpatizant të kësaj rryme ekstreme fetare, saqë me ndihmën e tyre Albini dhe partia e tij mund t`i fitojë votat dhe të ngritet në pushtet! Nuk e e dijmë vetëm atë se athua Albini dhe partia e tij e kuptojnë vallë se ardhja e tyre në pushtet nga një ndihmë e tillë, nuk u sjell as një të mirë as atyre në veqanti e as Kosovës në përgjithësi.

Mendonie për një çast sikur Albin Kurti dhe partia e tij të vinin në pushtet dhe të gjitha deputetet e partisë së tij femra të hynin në Parlament me shami!  Atëherë Parlamenti i Kosovës do të ngjante me Parlamentin iranian! Kosova do të fitonte përkrahjen vëllazërore myslimane të Iranit, Irakut, të Avganistanit! ...Dhe pas kësaj të gjitha ëndrrat dhe dëshirat tona, që ne si komb dhe si vend europian , që t`i bashkohemi Europës dhe të jemi pjesë e saj do të mbeteshin vetëm ëndrra dhe dëshira të parealizuara! ...

Ani çka do të brohorisnin ekstremistët islamik shqiptar?! A nuk u mjafton që tani gratë, motrat dhe bijat tona i kemi të mbuluara?!  A nuk u mjafton që ato tash janë të mbrojtura edhe nga rrezet e diellit?! Sepse ne nuk i duam ato rreze që trupin e femrës e nxjerrin në dritë! Ne duam që femrën ta ta kemi dhe ta shohim vetëm në terr?! E pastaj ne do të bëjmë çfarë të duam me të?! Mund ta duam, mund ta rrahim, mund ta dhunojmë,mund ta vrasim?!  Mund të bëjmë, bre, çfarë të duam me të?!  Sepse ajo është pronë e jona?!  Kështu e thotë hoxhë Shefqeti, kështu e thotë hoxhë Irfani dhe të gjithë hoxhallarët tonë që ne u pifshim ujë për shëndet???! ! ! ...

Pas deklaratave skandaloze të kryetarit të „Vetëvendosjes“ në raport me mësimin fetar nëpër shkolla dhe institucione arsimore në Kosovë dhe Shamisë zulmëmadhe për femra, qofshin ato edhe minorene?! ...,zor se do të gjejë përkrahje edhe tek të gjithë anëtarët e partisë së vet! Nëse do të gjejë përkrahje tek anëtarët e gjinisë mashkullore, zor se do të gjejë përkrahje nga anëtaret e gjinisë femërore! Dhe nëse do të gjejë përkrahje edhe nga disa nga ato, për interresa dhe favore nga më të ndryshe,vështirë se do të gjejë përkrahje nga Alma Lama! Dhe atë për arsyen më të thjeshtë, sepse ajo vetë, Alma Lama, kohë më parë është fyer dhe atakuar pikërisht nga eksponentë të kësaj rryme fetare dhe e cila tash është e detyruar që të lëvizë nën përcjelljen dhe mbrojtjen e policisë! Zor se Alma do të pajtohet me mendimet e kryetarit të saj! Logjika thotë se pas atyre deklaratave të kryterit të „Vetëvendosjes“ në raport me rrymenë ekstreme fetare në Kosovë, rrugët e Albinit dhe të Almës ndahen.Ata nuk do të mund të bashkëjetojnë më nën kulmin e përbashkët të një partie!

Një si këshilë në fund për Albinin dhe të gjithë ata që mirren me politikë:Fjala juaj ka peshë, por edhe jehonë të madhe në opinion!  Andaj sa jeni në politikë dhe në pushtet Kujdes me fjalët! ...