Qazim Shehu: Para monumentit të Lasgushit

PARA MONUMENTIT TË LASGUSHIT NË POGRADEC

 

Nga Qazim Shehu

 

Ku vanë sekretarët e partisë,

Poetët e tribunave ku vanë?

As lartësinë e Cucit që tek këmbët rri,

Sot nuk e kanë.

 

Ti këtë e dije atëhere,ne s`e dinim

As shkrojëtarët që përdëllehen sot për ty,

Kur për partinë thurnin himne,

Dhe ty s`të shihnin me sy.

 

Dhe të përfytyroj tek i vetëm,

Bridhje natën, mjerush,

Në funde liqeni treteshin

Vetmia dhe smerald i dhimbjes si prush.

 

Vallë e dije ti atëhere

Se do ktheheshe kështu në bronx

Duke i shtuar këtij qyteti

Lavdinë që meriton?

 

Kur poetët i thurnin lavdi partisë

Me duartrokitje,ovacion,

Ti qeshje hidhur dhe poezisë,

I dhe lavde siç meriton…

 

 

STRUGA

 

Struga

Qytet i poezisë,

Qytet i Drinit të Zi

Qyet i dashurisë,

Struga.

Kërkoj atë që më mungon

Seç më mungon s`e di,

Diçka që më trishton,

Trishtim mbi Drinin e Zi.

Që ik e ik tutje

Të derdhet në Shkodër

Me pikëllim malesh të lodhur

Diellin liqenor të zhvoshkur.

Struga, ky qytet

Ku fjala shqipe bën duel shekullor,

Përplaset çdo ditë me fjalën e huaj,

Kur në shtëpinë tënde

Ndihesh i huaj,

Me Drinin në gojë malesh,

Që herë pihet me etje,

E herë me lugë,

Për shkakun tragjik,

Se buron në Strugë…

 

 

SHQIPËRIA

 

Shqiptarët e pjestojnë Shqipërinë

Duke i kërkuar aq gjëra

Sa nuk i takojnë asaj

Aq dashuri,

Urrejtje,

Pasuri.

Duke e fajësuar

Për çfarë s`u pati faj.

 

Shumëzo e pjesto dhe u del

Një pikë lot.

 

As zjarr i armiqve

As mall i tyre

S`e than dot…

 

 

SHIKIMI

 

E mpreha shikimin dhe të pashë

Si re në humnera rashë

Dhe të mbusha me ajër.

 

Ndoshta qe një marrëzi

Si çdo marrëzi që s`merr emër

Por ti më godite në zemër.

 

Dhe çdo mendim që ethet merr

Kur shfaqesh dhe ndërkaq

E mpreha shikimin sikur në ferr

Terr,

Të zbres Orfe

Që Euridikën dot s`e kthe.

 

 

MBLEDHJE

 

Emri i detit që s`u pa,

Fjala që s`u tha

E thëna që s`u dëgjua

Dëgjimi që u harrua,

Harresa që u mpi

Mpirja që u shkri,

Shkrirja që u derdh,

Derdhja që s`u mblodh,

Mbledhja që u shpërnda.

Pluhur në zemër ra….