Dibran Demaku: Bashkimi Kombëtar

BASHKIMI KOMBËTAR

Nga Dibran Demaku

Vite më parë në një gazetë të njohur gjermane ishte botuar një karikaturë. Në atë karikaturë bëhej fjalë për ribashkimin e kombit dhe të shtetit gjerman. Në atë karikatur,  karikaturisti apo autori i saj kishte paraqitur dy gjerman në një kafe duke pirë. Njëri nga ata ishte i Gjermanisë perendimore, ndërkaq tjetri i Gjermanisë lindore. Ai i Gjermanisë lindore i gëzuar dhe i entuziazmuar që më në fund ishin të lirë dhe të bashkuar në një shtet ishte shprehur: Gëzuar vëllai im! Ja arritëm që të jemi një vend dhe një komb i bashkuar! Ai i Gjermanisë perendimore ia kishte kthyer:  Edhe ne gjithashtu! Karikatur në fjalë donte të thoshte se edhepse kombi dhe shteti gjerman ishte bashkuar fizikisht,  shpirtërisht ata ernde qëndronin larg njëri tjetrit. Shpirtërisht ata sikur e refuzonin atë bashkim. Dhe ndarja e shtetit dhe kombit gjerman nuk ishte aq e gjatë ta zëmë si ndarja e kombit dhe shtetit shqiptar. Kështu ishte para shumë vitesh,  atëherë kur kishin kaluar vetëm pak vite nga ribashkimi i kombit dhe shtetit gjerman e thuajse kështu është edhe tash kur kanë kaluar më se dy decenie nga ai ribashkim. Ribashkimin e kombit dhe shtetit gjerman edhe tash e refuzojnë disa nga qytetarët gjerman të gjermanisë perendimore (natyrisht vetëm në bisedat e tyre private). Dhe i tërë refuzimi i tyre ka të bëj për shkaqe ekonomike,  sepse sipas tyre ribashkimi i kombit dhe shtetit gjerman i ka varfëruar qytetarët e ish gjermanisë perendimore,  ndërkaq i ka favorizuar ata të gjermanisë lindore. . .

Vizavi me karikaturën gjermane,  një fenomen që sikur nuk e pranon bashkimin kombëtar të shqiptarëve,  të trumbetuar aq shumë kohët e fundit nga individ dhe parti të ndryshme politike,  u paraqit në një nga televizionet shqiptare. U paraqit me një titull që domosdo të kujtonte atë karikaturën gjermane. Në atë titull të atij lajmi televiziv shkruhej dhe thuhej: Sot u bë promovimi i filmit atistik shqiptaro-kosovar…dhe pastaj përmendej titulli i filmit. A nuk tregon vet ky titull për ndasinë e thellë që mbretëron brenda kombit sdhqiptar?! Ndasinë fizike dhe shpirtërore!Përse u dha ai lajm kulturor me atë titull dhe kujt ju desh ai?! A nuk do të mjaftonte të thuhej:  U bë promovimi i filmit më të ri artistik  shqiptar! Dhe jo vetëm kaq:  Në vazhdim të lajmit  thuhej se në atë film lujanë artistë shqiptar dhe kosovar!(sic). Sikur ta shihte një i huaj atë lajm do fitonte bindjen se ekzistueka një komb shqiptar dhe një komb kosovar?!. . .

Përvec mediumeve të ndryshme,  që me vetëdije apo pa të,  i mëshojnë fenomenit të vazhdimit të ndarjes dhe jo bashkimit shqiptaro-shqiptar (nuk dua ta shkruaj atë formën e urryer shqiptaro-kosovar,  sepse nëse e shkruaj do të thotë se e pranoj atë ndarje të thellë dhe me këte në mënyrë automatike sikur e miratoj dhe e pranoj termin e kombit kosovar!),  atë term që do ta ndeshësh kudo edhe nëpër fshatrat dhe qytetet e Shqipërisë,  por edhe të Kosovës:  Si je more kosovar?! Çfarë kemi andej nga Kosova dhe ju kosovarët?! Si venë punët me ju kosovarët?! Sikur kosovarët të ishin të një kombi krejt tjetër! Në anën tjetër nëpër fshatrat dhe qytetet e Kosovës do të dëgjosh:  E kam takuar sot n jë shqiptar nga Shqipëria?! Filani ishte martuar me një shqiptare nga Shqipëria?! Në filan qytetin e Kosovës po mbahet një koncert me këngëtar shqiptar nga Shqipëria etj,  etj…

Dhe jo vetëm kaq: Në një debat televiziv,  në një nga televizionet shqiptare,  një analist i njohur kur flitej për kosovën dhe qytetarët e saj do të thoshte:  Kosovarët në ish Jugosllavi e kanë perdorur gjuhën serbe si gjuhë të tyre?! Ata gjatë asaj kohe nuk e kanë folur gjuhën shqipe?! Dhe të pranishmit në atë debat nuk do të reagonin fare për ato thënie të pamenduara të analistit të njohur?( nëse mund të quhet i tillë). Dhe kur një analist nxjerr nga goja konstatime të tilla,  atëherë çfarë mund të presësh nga qytetarët e rëndomtë?!

Bashkimi kombëtar nuk bëhet me fjalime dhe me deklarata boshe! Dhe as nëpër mitingje dhe promovime politike! Bashkimi kombëtar së pari duhet të bëhet alfa dhe omega në shpirtin e qytetarëve shqiptar andej dhe këtej kufirit. Dhe tek pastaj i vie radha politikës. Përndryshe,  nëse ndodh ai bashkim në një formë tjetër atëherë edhe për shqiptarët do të vlente ajo karikatura gjermane.