Skënder Hoxha: Njëqind kujtime

SKËNDER R. HOXHA

NJËQIND KUJTIME
(Përkon me 100 Vjet Shtet Shqiptar)

Sivjet –
m’u kujtuan
njëqind ëndrra të trishta
për njëmijë vjet të prangosura
kalëruar dreqërish ogurzi!…

Sivjet –
i belbëzova njëqind fjalë
njëqind vargje
i bëra bashkë
njëqind ninulla
për shekujt e pagjumë!

Sivjet –
për të njëqindtën herë
e vesh këmishën e shkyer
të Atdheut!
Për të njëqindtën herë
puth hartën e copëtuar
të Atdheut…

Shqiponja në flamur –
nuk mplaket kurrë…