Artan Arsllani: Përfundoi “Ditët e Naimit”

Përfundoi Edicioni i XVI i Festivalit Ndërkombëtar të Poezisë “Ditët e Naimit”

DITËT E NAIMIT  E HAPËN SIPARIN NË TETOVË DHE E MBYLLËN NË PRISHTINË

Nga Artan Arsllani

Pamje nga hapja e Festivalit

Prej 18–21 tetor, në Tetovë, në Prizren dhe në Prishtinë u mbajt Edicioni i XVI i Festivalit Ndërkombëtar të Poezisë “Ditët e Naimit”. Ky shenjues kulturor u zhvillua në 100 vjetorin e Shpalljes së Pavarësisë së shtetit shqiptar në bashkëpunim me Universitetin Shtetëror të Tetovës dhe me PEN-in e Kosovës. Brenda tri ditëve u mbajtën një sërë aktivitetetesh letrare, artistike dhe kulturore. Në te morrën pjesë mbi 30 poetë nga vende të ndryshme të botës si: SHBA, Argjentinë, Finlandë, Norvegji, Danimarkë, Holandë, Gjermani, Itali, Francë, Spanjë,  Marok, Indi, Ukrainë, Algjeri, Bullgari, Turqi, Slloveni, si dhe nga e gjithe hapsira shqiptare.

Çelja festive e siparit të Edicionit të XVI u bë me anë të ndezjes së fishekzjareve para Qendrës së Kulturës, në Tetovë. Në fillim, nga drejtori i Festivalit, Shaip Emërllahu, nga laureatja Tua Forsstrom, nga kryetari LSHK, Adem Demaçi, nga rektori i USHT-së, Vullnet Ahmeti, u vendosën buqete lulesh para shtatores së poetit tonë kombëtar “Naim Frashëri”, që ndodhet në qendër të Tetovës, e të cilin Drejtoria Festivalit e pat ngritur në 100 vjetorin e vdekjes së tij. Pastaj, në foajenë e Qendrës së Kulturës, u hap ekspozita ‘100 Vjet Pavarësi e piktorit Miftar Mehmetit.

Hapja solemne e Edicionit të XVI të Festivalit Ndërkombëtar të Poezisë “Ditët e Naimit” u bë nga drejtori i Festivalit, Shaip Emërllahu, i cili në mes tjerash, tha se, ‘Në rrugëtimin 16 vjeçar të Festivalit, janë ngritur dhjetra ura diologimi brenda njerëzve të letërsisë, artit dhe kulturës shqiptare, por edhe të kësaj bote shpirtërore shqiptare me ate të huaj. Ndërkomunikimi përmes një infrastrukture të një shënjuesi të këtij formati kulturor dhe letrar, me letërsitë e tjera, ka bërë që shikimi shqiptar për letërsinë, për poezinë, pra për artin dhe kulturën në përgjithësi të formulojë edhe qasje të tjera që qarkullojnë me kohën.

Këtë edicion. me një fjalë përshëndetëse iu drejtua të pranishmëve kryetari i LSHK-së,  atdhetari Adem Demaçi dhe rektori i Universitetit Shtetëror të Tetovës, prof. dr. Vullnet Ahmeti.

Ndërkaq, në orën letrare ‘Globi poetik’ poetë të shumtë lexuan poezitë e tyre. Drejtori i Festivalit, Shaip Emërllahu ia dorëzoi çmimin e madh ‘Naim Frashëri’ dhe ia ndau titullin Anëtar Nderi të Festivalit laureates nga Finlanda, Tua Forsstrom

Adem Demaçi shpallet Anëtar Nderi i Festivalit

Po ashtu, Drejtoria e Festivalit në këtë jubile të 100 vjetorit të kurrorëzimit të përpjekjeve të shqiptarëve për mëvetësi i dha titullin Anëtar Nderi të Festivalit shkrimtarit dhe atdhetarit, Adem Demaçi. Të kujtojme se, titullin Anëtarë Nderi të Festivalit deri me sot, e kanë marrë shkrimtarët dhe intelektualët e njohur, si Ismail Kadare, Desmond Egan (Irlandë), Thomas Tidholm (Suedi), Manlio Argueta (Salvador), Abdellatif Laabi (Marok), Peter Poulsen (Danimarkë), Lionel Ray,  (Francë), Eva Lipska (Poloni), Craig Czury (SHBA) etj .

Në ditën e dytë të Programit, në amfiteatrin e USHT-së, u përurua laureatja, Tua Forsstrom. Për veprën e saj foli kryetari i Jurisë, Ymer Çiraku, ndërsa rektori Vullnet Ahmeti ia ndau asaj logon e Universitetit.

Më pas, poetët vizituan Teqen Arabati Baba në Tetovë, ku drejtuesit shpirtëror të kësaj teqeje shtruan një drekë për nderë të poetëve.

Poetja Hearth H.Thomas (SHBA)

Në pasditen e ditës së dytë të Festivalit poetët shkuan në Prizren dhe në Prishtinë. Në Prizren, mbajtën orën letrare ‘Poetë dhe vargje’, ndërsa në Teatrin Kombëtar në Prishtinë u mbajt nata finale e Festivalit, ku ata i përshëndeti Zv.Ministri i Kulturës, Rinisë dhe Sporteve, z. Hajdin Abazi dhe kryetari i PEN-it të Kosovës, Basri Çapriqi. Në orën e madhe letrare ‘Meridiane poetike’ u ndanë çmimet tjera letrare të Festivalit. Kështu, çmimi letrar për karriere poetike ‘Ditët e Naimit’ iu nda poetit shqiptar Rudolf Marku, çmimi për vlera të veçanta poetike ‘Menada’ iu dha poetit maroken Mohammed el Amroui, çmimi letrar për ciklin më të mirë ‘Oaeneumi’ e mori Donika Dabishevci dhe ‘Qiriu i Naimit’ shkoi në duart e poetes ukrainase Anna Bagriana.

Drejtoria edhe në këtë edicion botoi antologjinë e poezive të poetëve pjesëmarrës ‘Ëndërr e shituar’, të përgatitur nga Shaip Emërllahu dhe librin poetik të poetit algjerian Nouar Abidi, me titull ‘Tetova, kjo grua e bukur’.

Hapja e Edicionit të XVI të FNP “Ditët e Naimit” u transmetua drejtëpërdrejtë në Televizionin shtetëror të Maqedonisë - Programi në gjuhën shqipe, kurse mbyllja e Festivalit, u transmetua nga Radiotelevizioni i Kosovës.

Festivali u mbështet nga Ministria e Kulturës e Maqedonisë dhe Ministria e Kulturës, Rinisë dhe Sporteve e Republikës së Kosovës, T mobile, Euro Proekt, Dino, Emka, Arbi, Hit Oil, .