Lirikë dashurie nga Skënder Hoxha

SKËNDER R. HOXHA

LIRIKË DASHURIE

IONË DO TA MALLKOJ
          (Variant – 2)

Zogzemrushja fluturake
Bredh bregoresh e shkujdesur
Në të ngrysur zemërake –
S’di as vetë se si është pleksur!...

Unë, Promete atje me perënditë
Nuk zbres nga majë Piramide
IONË do ta mallkoj përditë
Tok me Nimfat Oqeanide…

NË KËRKIM TË MALLKIMIT

Shtigjeve të mia eci mejtueshëm
Me një deng kujtimesh të trishta
Jam udhëtar rebel i padëgjueshëm
Me erën ngrysem në lajthishta…

Në gjethe pylli bëj gjumë ëmbëlsisht
Zogjtë e natës më nanurisin melodisht.
Kur molisem në kërkim të mallkimit
Beatriçja më grish në rrugën e kthimit!

(Shtator 2012, Pejë)