Demir Krasniqi: Sa më ka marrë malli

SA MË KA MARRË MALLI

Oh , sa m’ ka marrë malli, në Guci  me shkua –
Këngët e lahutës , atje me i dëgjua !
Atje  jehojnë  këngët për trimat e hutës ,
Atje  këndohet Tringa , bijtë e Oso Kukës ...

Oh, sa m’ ka marrë malli,  në Tropojë me shkua –
Këngët malësore,  atje me i dëgjua !
Këngët vijnë nga malet , si vala e Valbonës ,
Këngët e Tropojës janë si buka e gojës .

Oh, sa m’ ka marrë malli,  me shkua në Shkodër –
Me vëllezër e motra , t’ shtrojmë aheng në sofër !
Të këndojmë së bashku , shumë  jare  shkodrane ,
Që janë krenaria dhe ajka e kësaj ane .

Oh, sa m’ ka marrë malli , në Tiranë me shkua –
Këngët e Shqipërisë s’ Mesme , atje me i dëgjua !
Këngët e Tiranës , janë si tambli i nënës ,
Janë si drita e diellit, janë si rrezja e hënës !

Oh, sa m’ ka marrë malli,  n’ Elbasan me shkua –
Këngët e Myzyrit ,  atje me i dëgjua !
Ta  mbajmë gjallë  kujtimin  për  Isuf Myzyrin ,
Si  nuset  në  gishta që e mbajnë myhyrin !

Oh, sa m’ ka marrë malli , deri n’ Korçë me shkua –
Këngë të serenadave , atje me dëgjua !
I dua me zemër ato serenada –
Janë t’ ëmbla si mjalti , janë si çokolata !

Oh, sa m’ ka marrë malli,  në Himarë  me shkua –
Këngë polifonike , atje me dëgjua  !
Këngët polifonike  s’ mund t’i gjesh mbarë globit ,
Janë këngë artistike , janë perlat e kombit !

Oh, sa m’ ka marrë malli , në Rugovë me shkua –
Valle jataganësh , atje me vallëzua !
Se si luhet vallja , flakëron  jatagani –
Ashtu n’ fushëbeteja  po ndahej mejdani !

Oh, sa m’ ka marrë malli , në Gjakovë me shkua –
Këngët arshikishte , atje me i dëgjua  !
Ashtu siç kënduan Ymeri e Qamili –
Këndojnë gjakovarët  t’ gjithë me zë  bilbili .
Oh, sa m’ ka marrë malli me shkua  n’ Prizren –
Atje ia thonë këngës gjithmonë me dyzen !
T’i  dëgjoj me ëndje këngët qytetare ,
Që janë ruajt ndër shekuj  mbi  trojet  shqiptare !

Oh, sa m’ ka marrë malli , në Drenicë me shkua  –
Këngët  rapsodike , n’ oda me  dëgjua !
Se ku jehon kënga n’ tela të sharkisë –
Atje këndohen trimat , n’ faqe t’ historisë !

Oh, sa m’ ka marrë malli me shkua  n’ Gjilan –
T’ shoh si luajnë burrat valle me tupan !
Valle krah për krahu  –  valle të merakut ,
Si vallëzonin trimat n’ Malësi t’ Karadakut !

Oh, sa m’ ka marrë malli , në Preshevë me shkua –
Valle brez për brezi  , atje me i vallëzua !
Vallet  autoktone – vallet  preshevare ,
Janë valle të bukura , janë valle krenare !

Oh, sa m’ ka marrë malli , n’ Gostivar me shkua –
Këngët nga kavalli , atje me i dëgjua !
Se si bien kavalli n’ oda t’ Gostivarit –
Ashtu shuhet malli n’ zemër t’ kurbetçarit !

Oh, sa m’ ka marrë malli , në Kërçovë me shkua –
Këngë burrash me iso atje me i  dëgjua !
Ashtu siç këndohen isot  kërçovare  –
Ashtu  kurorëzohen gjithë zemrat shqiptare !

Oh, sa m’ ka marrë malli , n’ Manastir me shkua –
Këngët e shkronjave shqipe , atje me dëgjua !
Atje n’ djep  të dritës ,  ku asht Manastiri –
Jehojnë këngët shqipe , bash si asht ma s’ miri !

Oh, sa m’ ka marrë malli , në Janinë me shkua –
Këngë e valle çame , atje me i dëgjua !
Këngë e valle t’ bukura , n’ veshje  koloriti –
Ku të kënaqet zemra , ku të kënaqet shpirti !

Aq sa të rrojnë gurët mbi kala t’ Janinës ,
Mbi kala t’ Razafës , mbi kulla t’ Vraninës ,
Mbi kala t’ Artanës , n’ malet legjendare –
Do të jetojnë këngët dhe vallet shqiptare !

Gjilan, më 23.09.2012. Demir KRASNIQI