Kosova aplikon për anëtarësim në Organizatën e Bashkëpunimit Islamik

Kosova ka aplikuar zyrtarisht për t’u bërë pjesë e Organizatës së Bashkëpunimit Islamik. Sekretari i Përgjithshëm i kësaj organizate, Ekmeleddin Ihsangoglu është takuar me Hashim Thaçin dy ditë më parë por në njoftimin për shtyp të bërë publik nga zyra e kryeministrit të Kosovës nuk u bë e ditur dorëzimi i kërkesës.

Por sipas njoftimit për shtyp nga OIC, bëhet e ditur se është diskutuar për rritjen e marrëdhënieve mes organizatës dhe Kosovës, përkatësisht për rritjen e mirëqenies së myslimanëve në rajonin e Ballkanit.

Thaçi pas dorëzimit të kërkesës për anëtarësim është shprehur se 95% e popullsisë së Kosovës është myslimane dhe se politikat e saj janë konform atyre të vendeve myslimane. Por ai shpjegoi se Kosova që të bëhet anëtare e OIC më parë duhet të bëhet anëtare e OKB-së.

OIC është organizatë jofitimprurëse dhe ka 57 vende anëtare, nga të cilat 30 kanë njohur pavarësinë e Kosovës. /F.S/ Shekulli