Dy poezi nga Selim Nëngurra

Selim Nëngurra

ÇUDITEM

Shohim andërra se jemi të tjerë,

se jemi të pathyeshëm,

të guximshem...

sypatrembun jemi e

të jashtëzakonshëm?

Mendojmë se

hekur hamë me dhambë!

Se kemi sy të përflakun!

Yllin në ballë

Se shtatë mileniume

i dimë përmendësh

emnat e lagjeve!

Pse jo,

Edhe emnat e krojeve,

të prrockave!

Dimë emnat e mbiemnat,

dimë nofkat

e herojëve të legjendave

të trillueme.

Çuditem

se si të tjerëve

ua dimë edhe dhambët në gojë!

Edhe zorret në bark!

Por mbi të gjitha çuditëm

si vetëkënaqemi

si adoleshentët,

kur dimë ……….

                        hiçgja!

LIRIA

Liria asht bukuri,

Bukuri e pafund.

Të jesh i lirë

Do të thotë

Fati të ka puthë në ballë.

Se poetin,

a ka ma të lirë?

Mos e shqetësoni;

ai po andërron ditë të bardha,

ditë ma të mira.

Sarpsborg: 27.02.2012