Vangjush Ziko: Zoopoeteka

Vangjush Ziko

ZOOPOETEKA

BRESHKA

Breshka,breshkë.

Një copë mish.

E tëra eshtër.

Eshtër zgafellë,

Një ashkëti

Brenda në shpellë.

Lutet dhe falet

Duke zvarritur,

Heshtur,pa fjalë,

Zgjuar,dremitur.

Në zheg e shqotë

E mbart zgafellën.

Shtegton drejt zotit

Bashkë me shpellën.

PILIVESA

Lule pas lulesh.

Ngjyrë më ngjyrë.

Me krahët lyer

Me pluhur yjesh,

Vesë mëngjesi

dhe brymë nate.

Me prush të fshehtë

Imagjinate.

Vello e ëndrrës

Së pilivesës...

S' i shkon në mendje

Sa shpejt do vdesë.

BILBILI

Gush' e bilbilit di veç një notë.

Një këngë veç këndon në mote.

Nuk i mërzitet.S' i zvetënitet.

Gushën e tij e bën të dridhet.

Muzës sime i bënë pyetje

Se çfarë këngë këndon poeti.

U ktheu përgjigje muza vetë.

Vetëm një këngë këndon tër' jetën.

Vetëm një këngë këndon bilbili.

Këngën e mallit me afshn' e prillit.