Vangjush Ziko: Orët

Vangjush Ziko

O R Ë T

ORA DIELLORE

Koha

jam vetë.

Hija ime

të ndjek.

S' ndahesh dot.

Pa hijjen time

s' ka kohë.

Dielli ndrit kot.

ORA RANORE

E vjetër sa detet.

Sa ditët dhe netët.

Sa drita

dhe terri.

Mes parajse

dhe ferri

Vetëm rrjedh

dhe rrjedh.

Armike e prehjes.

Jeta rrjedh

mes gishtash

të vdekjes.

ORA MODERNE

Ç' fitova?

E zgjata dot jetën?

Largova tej vdekjen?

Ç' astin e lumtur

e ndala dot?...

Kohën mat

dhe mat

mbarë

dhe prapthi

me zemër kuarc

a çelik...

Koha ik.

Dhe vetëm ik.

ORA ZEMËR

Nuk mat

as ditë

as netë.

S' mat jetën

as vdekjen.

Vetëm

një çast të vetëm.

Për vete.

Për njerinë.

Mat dhimbjen

a

lumturinë.