Vangjush Ziko: Pesë muza-amazona nga stepa ruse

PESË MUZA-AMAZONA NGA STEPA RUSE

Vangjush Ziko

NJË HERË VETËM ÇEL-  Kerubina de Gabrian

Një herë vetëm çel,vetëm një herë

Me zjarrë e dalldisur të prenverës...

Eja në pyll,atje ku kam limerë.

Më shkul me rrënjën bashkë përngaherë.

Më duaj.Jam e jotja me gjithçka.

Ti mos më lerë lulen që ta thaj.

E hidhur si bajamja vetë jam,

As vdekja këtë joshje nuk e ka.

MË DUAJ MUA -Maria S. Petrovih

Më duaj mua.Unë jam ferri,

E verbër jam dhe mëkatare.

Kush do më deshte,përveç teje?

U poqën fatet udhëtare.

Shikoi yjet se si ndizen

në terr' e qiellit.Është e kot.

Ti jetën tënde me timen lidhe

Siç lidhet nata me ditën tok.

Ti zgjedhje tjetër më kot prite,

Unë jam terri e ti je drita.

AJO E DASHUR...-Irina S. Moisejeva

Ajo e dashur,unë m' e shtrenjtë.

Njëra kërkohet,tjetra zor gjendet.

Se ç' ngjashmërie llahtarisëse

Në mes të besës e tradhëtisë.

Një gjë e them unë pa tutur.

Me zjarr i preka atij faqen

Dhe,sado jeta që të zgjatet,

Ajo do jetë prap' e shkurtër.

TMERROHEM KUR MENDOJ-Marina N. Belançikova

Tmerrohem kur mendoj se ty të dashuroj,

S' kam forcë që të ik,as pranë të të rri

Afrohem të të prek dhe buzët përvëloj,

Shkëputem për një çast dhe buzët bëhen hi.

Tmerrohem kur mendoj se vetëm ty të kam,

Se shkrumb duk' u zhuritur,nga hiri dot s' rilind.

Në natën e ndriçuar dritaren unë hap

Siç hap dhe shpirtin tim të mbushur me shkëlqim.

NUK MË PRISJE -Ekaterina A. Gorbovska

Nuk më prisje,por të erdha.

Tungjatjeta!Futmë brenda.

Ke ndryshuar shumë ti,

Si e hodhe këtë vit?

Iku viti me nxitim,

Iku,o i dashuri im...

U mërzita sa u çmenda...

Prezantomë gruan tënde.

Nga libri me përkthime

TREQIND VJET DASHURI